मिर्मिरेया प्रसारण सामाग्री खुयाः यंकूगु दच्छि क्यन
रेडियो मिर्मिरेया प्रसारण उपकरण खुयाः यंकूगु थौं दच्छि पूवंगु दु । वंगु दँ असोज १५ गते खुयाः यंकूगु रेडियोया उपकरण अझ नं लित ब्यूगु मदुनि ।
प्रसारण उपकरण लुटपाट जूगु दच्छि बीधुंकाः नापं दोषीयात कानुनी कारबाही यायेगुया पलेसा सरकार व एकीकृत माओवादीं हे संरक्षण बियाः तःगुलिं सञ्चालक समितिया नायः घनश्याम श्रेष्ठं च्यूताः प्वंकादीगु दु ।
वय्कलं रेडियोया प्रसारण ज्वलंत खुइगु ज्याय् ल्हाःदुपिंत याकनं कार्बाही याकेत व खुयाः यंकूगु ज्वलं लित बीकेत सरकारयात इनाप याःगु दु ।
जनताया सूचना दइगु अधिकारपाखें बञ्चित यानाः रेडियोया ज्वलं खुयाःकाःपिं म्हसीके धुंकाः नं सम्बन्धित निकायं बेवास्ता याःगु बिरोधय् रेडियो मिर्मिरें थौंया दिंयात हाकुगु न्हिंया रुपय् लुमंकूगु दु ।
एकीकृत माओवादीया प्रवक्ता अग्नीप्रसाद सापकोटाया निर्देशनय् वय्कःया हे काय्चा विष्णु प्रसाद सापकोटाया नेतृत्वया पुचलं रेडियोया ट्रान्समिटरया एक्साईटर, स्वंगः थान कम्प्यूटर, च्यागू थान हार्ड डिस्क लगायतया ज्वलंत खुयाः यंकूगु खः ।
मिर्मिरे ब्यवस्थापन पक्षं खुयाः यंकेगुलिइ ल्हाःदुपिनिगु नां नापं किटान यानाः प्रहरीइ उजुरी ब्यूसां नं अझ नं कारबाही मजूगु जानकारी ब्यूगु खः ।
