भारतीय नम्बर प्लेट दुगु गाडीइ पंगः
नेकपा-माओवादीं बिहिवाःनिसें देय्न्यंकं भारतीय नम्बर प्लेट दुगु दक्व हे गाडी चलेयाके मबीगु घोषणा याःगु दु । गाडीलिसें भारतीय संकिपा नं क्यनेज्याय् पंगः थनेगु बुधवाः प्रेस विज्ञप्ति पिथसें प्रवक्ता पम्फा भुषालं जानकारी बियादीगु दु ।
''राष्ट्रिय आत्मनिर्भर, अर्थतन्त्रया विकास, नेपाली नागरिकया रोजगारीया संरक्षण, नेपाली लागनीया सदुपयोग व भारतय् नेपाली यातायातय् तःगु पंगलं ब्वलंगु असमानतायात ध्यानतसें जिमिगु पार्टीं थ्वहे असोज ११ गतेनिसें नेपाः दुने भारतीय नम्बर प्लेटया गाडी चलेयाके बीमखुगु निर्णय याःगु दु । नेपाः दुहाँ वयाच्वंगु भारतीय सवारीसाधानयात धाःसा भारत वनेत छुं नं पंगः मदु'' विज्ञप्तिइ न्ह्यथनातःगु दु ।
माओवादीं घोषणा यानातःगु ताम्सालिङ्ग राज्यय् धाःसा बुधवाःनिसें हे भारतीय नम्बर प्लेटया गाडीइ पंगः थनाब्युगु दुसा भारतीय संकिपां नेपाः व नेपाःमितय्त अपमान याःगु व अश्लिल साँस्कृतिक विकृति ब्वलंकाःच्वंगु पाः यानातःगु दु ।
