नेवाः देय् दबूया तःमुँज्या न्ह्यात, आइतवाः बन्दसत्र
नेवाःतय् राष्ट्रिय संगठन नेवाः देय् दबूया खुक्वःगु तःमुँज्या शनिवाःनिसें सुरु जूगु दु । प्रधानमन्त्री डा. बाबुराम भट्टराईं येँया बसन्तपुली जूगु उद्घाटन सत्रया उलेज्या यानादीगु खः ।
उलेज्याझ्वलय् प्रधानमन्त्री डा. बाबुराम भट्टराई, वातावरण मन्त्री डा. केशवमान शाक्य, नेपालभाषा एकाडेमिया चान्सलर सत्यमोहन जोशी व नेवाः देय् दबूया नायः नरेश ताम्राकारं सम्बोधन यानादीगु खः ।
ज्याझ्वलय् नेपालभाषा ख्यलय् दकलय् तःधंगु धनराशी दुगु नारायणदेवी–सत्यनाराण सिरपा नं लःल्हाःगु खः । थुगुसी निसें बिइगु सुरु जूगु थुगु सिरपाः झीगु समाज धरान व अम्बिका श्रेष्ठयात लःल्हाःगु खः । उगु सिरपाःया धनराशी छगू लखः खः ।
अथेहे ठाकुरलाल सिरपा नं उगु हे ज्याझ्वलय् नेवाः एफएमयात लःल्हाःगु खःसा नेपालभाषां बुखँ व ज्याझ्वः प्रशारण यानावयाच्वंगु थीथी टेलिभिजन च्यानलयात नं सम्मान याःगु खः ।
उलेज्या लिपा शनिवाः हे बन्दसत्र सुरु जुइगु धाःसां बन्दसत्र आइतवाः जक न्ह्याइगु जूगु दु । आइतवाःया बन्दसत्रय् देय् दबूया विधान संशोधन यायेत नीस्वनातःगु विद्यान संशोधन समितिं संशोधित विद्यान न्ह्यब्वइगु ज्याझ्वः दुसा उकीया बारे बन्दसत्रय् सहलह लिपा परिमार्जन सहित पारित याइगु खँ धाःगु दु ।
अथेहे देय् दबूया न्हूगु नेतृत्वया निंतिं सोमवाः निर्वाचन जुइगु ज्याझ्वः दु । थुगुसी नेतृत्व पदया निंतिं आपालं नेवाः न्ह्यलुवाःतय्सं थःगु नां न्ह्यःने हःगु खःसां लिप्पांगु इलय् निम्हेसिनं जक नेतृत्वया निंतिं उम्मेदवारी बिइगु सम्भावना अप्वःगु दु ।
देय् दबूया वर्तमान नायः नरेश ताम्राकार व पवित्र वज्राचार्य जक नायः पदया निंतिं उम्मेवारी बिइगु सम्भावना दुसा ताम्राकार व बज्राचार्यं थःथःगु हे प्यानल दयेकाः निर्वाचनय् वनीगु जूगु दु ।
