'नेपालय् तःतधंगु ह्युपाः हयेगुलि नेवाःतय् च्वछाय्बहःगु योग्दान दु'

प्रधानमन्त्री डा. बाबुराम भट्टराईं नेपाल तःतधंगु ह्यूपाः ह्येगुलि नेवाःतय् च्वछाय्बहःगु योगदान दुगु खँ धयादीगु दु । ‘नेपाःयात सामाजिक, राजनीतिक व आर्थिक रुपं च्वन्ह्याकेगु अले युग कथं न्हू न्हूगु ह्यूपाः हयेगु आन्दोलनय् नेवाःत न्ह्यःने लाः ।’ प्रधानमन्त्री भट्टराईं धयादिल, ‘राणा शासन विरुद्धया अभियाननिसें दक्कले लिपाया जनयुद्ध व जनआन्दोलनया झ्वलय् नं नेवाःतय्सं अग्रणी भूमिका म्हितल ।’

नेवाः देय् दबूया खुक्वःगु तःमुँज्याया उलेज्या यानादिसें प्रधानमन्त्री भट्टराईं आःया आवश्यकता जनयुद्ध व जनआन्दोलनं प्राप्त उपलब्धीया रक्षां यासें संविधानसभा मार्फत उकीयात संस्थागत यायेगु जूसां राजनीतिक दलतय् दथुइ सहमति जुइमफया उगु ज्या बिचे थानाच्वंगु धयादिल ।

‘थ्व इलय् राज्यया ब्वहलय् दुगु भाला धइगु संविधान सभाया माध्यम न्हूगु संविधान दयेकाः जनयुद्ध व जन आन्दोलनया झ्वलय् जनतां अनुमोदनयाःगु संघीयता, लोकतान्त्रिक गणतन्त्र, धर्मनिरिपेक्षतायात संस्थागत यायेगु खः ।’ वय्कलं धयादिल, ‘तर प्रमुख दलतय् दथुइ सहमति जुइमफुगु कारणं राष्ट्रिय राजनीतिया लँपु भचा स्पष्ट जुइ मफयाच्वंगु दु ।’

अथेहे वय्कलं पहिचान सहितया स्वायत्त राज्य पलिस्था यायेत थःगु नेतृत्वय् दुगु सरकार व थःगु पार्टी प्रतिबद्ध दुगु धयादिल । वय्कलं पहिचान सहितया संघीयता सहित जनताया अधिकार सुनिश्चित यायेत नेवाः समुदायया तिबः दुसा न्ह्याःगु पंग व समस्या वःसा छन्हु अवश्य सफल जुइगु धयादिल ।

उगु हे ज्याझ्वलय् वातावरण मन्त्री डा. केशवमान शाक्यं नेवाःत नेवाः स्वायत्त राज्य पलिस्था यायेत आन्दोलित जुयाच्वंगु न्ह्यथनादिसें झीगु एजेण्डायात सुनिश्चित यायेत थीथी पार्टीया भातृ संगठन जुयाः मखसें आः झी थःहे छप्पँ जुयाः न्ह्याः वनेमाःगु धयादिल । वय्कलं झीगु आज्जु धइगु हे राज्यया शासन प्रणालीइ समानुपाति प्रतिनिधित्व यायेगु खः धयादिल ।