नेवाः देय् दबूया खुक्वःग तःमुँज्याः सुरु [लाइभ अपडेट]
येँया बसन्तपुली जुयाच्वंगु उलेज्याझ्वःपाखें लाइभ अपडेट
– नेवाः देय् दबूया नायः नरेश ताम्राकारपाखें सभा क्वचाःगु घोषणा
----------------------------------------------
– संस्कृतिविद् सत्यमोहन जोशीपाखें सम्बोधन
----------------------------------------------
– वातावरण मन्त्री डा. केशवमान शाक्यपाखें सम्बोधन
– नेवाः राज्य स्वनेत झी अग्रसर जुयाच्वनागु जुल ।
– संघीयता व पहिचानया आन्दोलनय् ताःलाकेत झी पार्टीया भातृ संगठन जुयाः जक मगाः ।
– झीगु थःगु एजेण्डा ज्वनाः झी थः हे न्ह्याः वनेमाः ।
– नेवाःतय् सवाल धइगु राज्यया शासन दुने समानुपाति प्रतिनिधित्व याकेगु ।
----------------------------------------------
– प्रधानमन्त्री डा. बाबुराम भट्टराईपाखें नेपालभाषां सम्बोधन
- नेवाःत नाप जिगु तःदँ न्ह्यवनिसेंया बांलागु स्वापु दुगु खःसां थुकथं राष्ट्रिय स्तरया नेवाःतय् ग्वसालय् जुयाच्वंगु थुज्वःगु अतिकं तःजिगु ज्याझ्वलय् ब्वतिकयाच्वनागु जिगु न्हापांगु अनुभव नं खत । थ्व ल्याखं नं जितः भचा भावुक दयेका बियाच्वंगु खत ।
- नेवाः छगू देय्या मू आदिवासी समुदायया ल्याखं थ्वया थःगु विस्कं म्हसीका दु ।
- नेवाःतय् हे कला, संस्कृतिया माध्यमं थौं विश्वन्यंक नेपाः देय्या इज्जत प्रतिष्ठा धस्वानाच्वंगु दु ।
- नेपाःयात सामाजिक, राजनीतिक व आर्थिक रुपं च्वन्ह्याकेगु अले युग कथं न्हू न्हूगु ह्यूपाः हयेगु आन्दोलनय् नं नेवाःत उलिहे न्ह्यःने लाः ।
- राणा शासन विरुद्धया अभियाननिसें दक्कले लिपाया जनयुद्ध व जनआन्दोलनया झ्वलय् नं नेवाःतय्सं अग्रणी भूमिका म्हितल । अझ नेपाःया वामपन्थी आन्दोलन व नेपाल कम्यूनिष्ट पार्टीया संस्थापनया इतिहासयात लुमंकेगु खःसा नेवाःतय् विशिष्ट भूमिका दु ।
- छुं ई थुखेंनिसें जिं सतिक्क च्वनाः अध्ययनयायेगु व दुवालेगु यानाच्वना, विशेष यानाः देसय् न्ह्यानाच्वंगु शान्ति स्थापना व संविधान निर्माणया मुद्दाय् नेवाःतय् भूमिका अतिकं सकरात्मक व च्वछायेबहः ।
- छिकपिं नेवाःत, अले देय्या सकल आदिवासी जनजाति, मधेशी, मुस्लिम, दलित व महिला समुदायपिन्सं गुकथं पहिचान सहितया संघीयताया सुनिश्चितताया निंतिं सः थ्वयेकाच्वंगु दु, न्हूगु संविधानय् थुगु मुद्दा संस्थागत जुइ ला मजुइ ला धैगु गुगु न्ह्यसः छिकपिंके दु, जिं छिकपिनिगु थुगु तःमुंज्याया दबुलिं धयाच्वना, जि, जिगु नेतृत्वय् दुगु सरकार अले जिमिगु एकिकृत नेपाल कम्यूनिष्ट पार्टी (माओवादी) सदां छिकपिनिगु पक्षय् दु ।
- नेवाःतय्सं गुगु कथं पहिचान दुगु स्वायत्त राज्यया पक्षय् सः थ्वयेकाच्वन, थुकि सदां थें थौं नं थ्व दबुलिं जिगु प्रतिवद्धा प्वंकाच्वना ।
- छिकपिनिगु थ्व महत्वपूर्ण तःमुंज्या ताःलायेमाः । तःजिक क्वचायेमाः । नापं तःमुंज्यां सक्षम, सवल व सशक्त न्हूगु नेतृत्व ल्ययेत नं ताःलायेमाः । जिगु दुनुगलंनिसं भिंतुना द्यछाना ।
----------------------------------------------
– टेलिभिजनय् नेपालभाषां ज्याझ्वः न्ह्याकाच्वंगु च्यानलतय्त सम्मान
(सम्मान जूगु टिभी च्यानल – इमेज च्यानल, सगरमाथा टिभी, नेपाल वान, हिमालयन टिभी, नेपालमण्डल टेलिभिजन)
– प्रधानमन्त्रीपाखें नारायणदेवी–तीर्थनारायण सिरपा लःल्हानादिल
– सिरपा घोषणा
नारायणदेवी–तीर्थनारायण सिरपा - झी समाज धराण / अम्बीका श्रेष्ठ (द्वारिका होटल)
ठाकुरलाल भाषा सहित्य सिरपा - नेवाः एफएम
– प्रधानमन्त्रीपाखें सुकुन्दा च्याकाः ज्याझ्वःया उलेज्याः
– नेवाः देय् दबूया न्वकु धर्मशोभा तुलाधारपाखें लसकुस न्वचु
– नेपाः व नेवाःया राष्ट्रिय गान
– ब्याज वितरण
– आशन ग्रहण
