सीएनएन हिरोया टप टेनय् पुष्पा बस्नेत

थीथी अपराधया हुनिं जेलय् च्वनेमाःपिं मांबौनापं च्वनेत बाध्य मस्तय्त उद्धारयासें ब्वलंका वयाच्वंम्ह पुष्पा बस्नेत सीएनएन हिरो २०११ या टप टेनया धलखय् लायेत ताःलाःगु दु ।

अमेरिकी टेलिभिनज च्यानल सीएनएनं वंगु चान्हय् सार्वजनिक याःगु टप टेनया मनोनयनय् पुष्पा बस्नेत लाःगु खः । आः भोटिङ्गया आधारय् सीएनएन हिरो घोषणा जुइगु खः ।

सीएनएन हिरों २ लख ५० द्वः अमेरिकी डलर त्याकीगु खःसा टप टेनय् लाइम्हेसिनं ५० द्वः अमेरिकी डलर त्याकीगु खः । हलिंन्यंक असाधारण ज्या याइपिं मध्यलय् सन् २००७ निसें दँय्दसं छम्हेसित सिएनएन हिरोया अवार्ड बियावयाच्वंगु खः । सन् २०१० या सिएनएन हिरोया अवार्ड माइती नेपालया अनुराधा कोइरालां त्याकादीगु खः ।


भोट गुकथं यायेगु ?
दक्कले न्हापालाक http://heroes.cnn.com/ वा http://edition.cnn.com/SPECIALS/cnn.heroes/2012. heroes/pushpa.basnet.html क्लीक यायेगु व धुंकाः VOTE NOW य् क्लीक यायेधुंकाः पुष्पा बस्नेतया किपाय् क्लीक यायेगु । अनंलिपा क्वय्पाखे पुष्पा बस्नेतया किपा वइ । किपा लिक्कसं खाली बक्सय् थःगु इमेल च्वयेगु अले क्वसं बियातःगु कोडयात गथे खः अथेहे च्वया VOTE य् क्लीक यायेधुंका छकू भोट पुष्पायात ब्यूगु जुइ । थुकथं नोभेम्बर २८ तक न्हिंथं छगू हे इमेलं १० क्वःतक भोट याये ज्यू ।

फेसबुकं नं भोट
पुष्पा बस्नेतयात फेसबुकं नं भोट यायेज्यू । थुकिया लागि च्वये न्ह्यथनाथें न्हापां http://heroes.cnn.com/वा http://edition.cnn.com/epecials/cnn.heroes/2012.heros/pushpa.basnet.html क्लिक यायेगु । वधुंकाः VOTE NOW य् क्लीक यायेधुंकाः पुष्पा बस्नेतया किपाय् क्लीक यायेगु । अले क्वय् पुष्पा बस्नेतया किपा वइ । किपा लिक्कसं इमेलपाखें भोट यायेगु तरिका व फेसबुकपाखें भोट यायेगु निगू मध्ये फेसबुकपाखें धाःगुलिइ क्लीक यायेगु । अले लग इन या धायेधुंकाः फेसबुक लग इन यायेधुंकाः छकू भोट वनी । थुगु तरिकां नं न्हिं १० क्वः तक भोट यायेफै ।

सु खः पुष्पा ?
येँ डिल्लीबजारया २८ दँया पुष्पा मांपिंसं याःगु अपराधया हुनिं इपिंनापं जेलय् च्वनेत बाध्य निर्दोष मस्तय्त उद्धार व ब्वलंकेगुलिई सक्रिय जुयाच्वनादीम्ह खः ।

८ दँ न्ह्यः सेन्ट जेभियर कलेजय् सोसियल स्डजिया विद्यार्थी जीवनय् प्राक्टिकलया लागि सुन्धाराया जेलय् थ्यंम्ह पुष्पायात लिहाँ वयेगु झ्वलय् छम्ह मिसाया मुलं च्याला दुम्हमचां ज्वनातःगुलिं व मचायात उद्धार यायेमाःगु मनय् लुत । कारागार प्रशासनं बीगु दैनिक सिधाया भरय् व मिसां थःमस्तय्त ब्वलंकाःच्वंगु सीसातकी मन तये मफुत व अर्ली चाईल्ड हुड सेन्टर पलिस्था याना जेलय् अभिभावकनापं च्वनाच्वंपिं मस्तय्त उद्धार याना इमित ब्वलंकेगुलिसें शिक्षा दिक्षाया नं जिम्मेवारी कयादिल ।

२०६२ सालं पलिस्था जूगु सेन्टरं जेलय् अभिभावकनापं च्वंच्वंपिं मस्तय्त उद्धारयासें इमित नकेगु, च्वनेगु व ब्वंकेगु व्यवस्था यानावयाच्वंगु दु । आः सेन्टरय् ४० म्ह मस्त दु । इमिगु हेरचारया लागि पुष्पा लिसें ४ म्ह चांन्हिं खटेजुयाच्वंगु दु ।