चीनय् नेपाल कल्चरल फेस्टिभल २०१२

वंगु आइतवाः १६ सेप्टेम्बर २०१२ खुन्हु चीनया राजधानी बेइजिङ्गय् च्वंगु नेपाली राजदुतावासं थीथी नेपाली ज्याझ्वः यासें ''नेपाल कल्चरल फेस्टिभल-२०१२'' तःजिक हन । नेशनल सेन्टर फर परफरमिङ्ग आर्टया हलय् याःगु उगु ज्याझ्वः नेपालया उप-प्रधानमन्त्री व परराष्ट्र मन्त्री नाराणकाजी श्रेष्ठ व चीनया उप परराष्ट्रमन्त्री फु यिङ्गं मंकाः कथं उलेज्या यानादीगु खः ।

चीनया लागि नेपाली राजदूत महामहिम डा. महेश कुमार मास्कें लसकुस यानादीगु उगु ज्याझ्वलय् नेपाली व चीनया अति विशिष्ठ ब्यक्तिपिनिगु ब्वति दुगु खः । सुकर्म ब्याण्डया कलाकारपिंसं नेपाल व चीनया राष्टी्य धुन थानादीगु खःसा चिनयाँ ल्वकंह्वाःम्ह कलाकार बेन लिउनियमलिसें थीथी धुनत न्ह्यब्वःगु खः । नेपालं झायादीम्ह श्री कला नाट्य समुहया नायः कृष्ण भक्त महर्जनलिसे मेमेपिं कलाकारपिंसं मंजुश्री प्याखँ, टप्पा, तामाङ्ग सेलो, लाखे प्याखँ, धिमे प्याखँ, कुमारी प्याखँ, याक प्याखँ, मयुर प्याखँ, झागड प्याखँ थेंजाःगु प्रचलित लोक प्याखँत न्ह्यब्वःसे ज्याझ्वयात न्ह्याइपुका ब्यूगु खः ।

बेइजिङ्गय् च्वंगु नेपाली राजदूतावसया ब्वनाय् हङ्कङ्गं झायादीपिं वरिष्ठ म्येहालापि व संगीतकःमि चेतमान गुरुङ्ग व वरिष्ठ तबला बादक हरी श्रेष्ठया बाजनं सकसिगुं मन त्याकेत ताःलाःगु खः । म्येँ हालामि चेतमान गुरुङ्गं, भजन शिरोमणी भक्त राज आचार्यया ''जहाँ छन् बुद्धका आँखा... '' बोलया म्येँ अतिकं भावपूर्ण व राष्ट्रीय भावनां जाःगु म्येँ हालादिसें सकलसित न्ह्याइपुका बिल । म्येँ हालामि चेतमान गुरुङ्ग व हरी श्रेष्ठं बुद्ध नेपालय् बूगु खः धासें नेपाली, अग्रेजी व चिनियाँ स्वताभाषं च्वयातःगु ब्यानर लिसें बुद्धम शरणम् गच्छामि... धम्मं शरणम् गच्छामि... सँघम शरणम् गच्छामि... धकाः बाचन यानादीबलय् लापाथाःगु सलं हलहे थ्वयेकाबिल । उगु ज्याझ्वलय् नेपाल एकेडेमी अफ म्युजिक एण्ड ड्रामाया रामकृष्ण दुवालजुं नं म्येँ न्ह्यब्वयादीगु खः ।

ज्याझ्वःया निन्हुगु न्हि १७ तारिखखुन्हु नेपाली व चिनियाँ चित्रकारपिंसं चित्रकला प्रदर्शन यानादीगु खः । उगु चित्रकला प्रदर्शनीं नेपाल ललितकला प्रज्ञा प्रतिष्ठानया कुलपती किरण मानन्धर, कर्ण प्रसाद मास्के, सन्त कुमार राई, केके कर्माचार्यलिसें चिनियाँ चित्रकारपिनिगु चित्र प्रदर्शन याःगु खः । महामहिम राजदूत डा.महेश कुमार मास्कें, नेपाल व चिनियाँ चित्रकारपिंत प्रशंसा पत्र लःल्हानादीगु खःसा उगु हे न्हिस सनिलय् राजदूतावासय् सकल कलाकारपिंत प्रशंसा पत्र लःल्हानादीगु खःसा खादा क्वखायेका हनादिसें रात्री भोजया नं ब्यवस्था यानादीगु खः ।