प्यम्ह सशस्त्र प्रहरी सहित न्हयम्हेसित ज्वन
न्यूरोडया ब्यापारीतय्त सुरक्षाकःमिया म्हसिका क्यना धम्की विया बन्धक तकं दयेका ध्यवा काईपिं छगू गिरोहयात ज्वनागु नेपाल प्रहरीया केन्द्रीय अनुसन्धान ब्यूरों जानकारी ब्यूगु दु । ब्यूरों ज्वंपिं मध्ये स्वम्ह सशस्त्र प्रहरीया हवल्दार व छम्ह सशस्त्र प्रहरीया जवान खः ।
सशस्त्र प्रहरीनापं घटनाय् दुथ्याःपिं न्हय्म्हेसित नेपाल प्रहरीं मंगलवार अपहरण व शरीर बन्धक ऐन अन्तर्गत माःगु कारवाहीया लागि महानगरीय प्रहरी परिसर येँय् छ्यावियागु ब्यूरों जानकारी ब्यूगु दु ।
ज्वंपिं सशस्त्र प्रहरी बल गुहेश्वरी गण दुवाकोट ख्वपय् च्वंम्ह २९ दँया सशस्त्र प्रहरी हवस्दार गीरबहादुर पाण्डे, उगु हे गणय् च्वंम्ह ३४ दँया सशस्त्र प्रहरी सहायक हवल्दार रामबहादुर खत्री व ३४ दँया सशस्त्र प्रहरी सहायक हवल्दार हरिकुमार थापा २१ दँया सशस्त्र प्रहरी जवान खेमराज गुरुङ्ग खः ।
अथेहे महादेवटार गा.वि.स. वडा नं. ८ ग्वङ्गबुँईं च्वंम्ह २८ दँया निरज थापा, लम्जुङ्ग कुन्छा गाविस वडा नं. ३ कुन्छा छेँजुया थौंकन्हय् येँय् वडा नं. २२ गल्कोपाखय् डेराय् च्वंच्वंम्ह २२ दँया अनिल मिश्र व महादेवटार गाविस वडा नं. ८ ग्वङ्गबुँईं च्वंम्ह २३ दँया युगल पौडेलयात नं ज्वंगु ख: ।
अनुसन्धानया झ्वलय् ज्वंपिंत लुटपाटय् ल्हाःदुगु खनेदुगुलिं निलम्बन यासें विभागीय कारवाही समेत न्ह्याकेगु सशस्त्र प्रहरी न्ह्यथंगु दु ।
