सरकार गठनय् अन्तर्राष्ट्रिय बेइज्जत
एमालेया पुलांम्ह महासचिव माधव नेपालया अध्यक्षताय् गठन जूगु सरकार इतिहासय् हे दकलय् बेइज्जतपूर्ण स्थितिइ थ्यनाच्वंगु दु । छखे ला सरकारय् दुहां वयाः उपप्रधानमन्त्री जुयाच्वंम्ह विजय गच्छदारयात वय्कःया थःगु हे पार्टी मधेशी जनअधिकार फोरमं पितिना हःगु दुसा थुकिं यानाः फोरम विभाजित जुयाः निकू जूवंगु दु । फोरमया थ्व विभाजनया लिच्वः सरकारया स्थायित्वय् गुकथं लाइगु खः व ला स्वये हे ल्यं दनि ।
उखे स्वय्म थःहे पार्टीइ नं मन्त्री जुइपिनि नां ल्यये मफयाः पार्टी अध्यक्ष लिसे तनाव सिर्जना जुयाच्वंगु दु । कांग्रेसं सरकार गठनय् ग्वाहालि याःगु खःसां मन्त्रालय कायेगु खँय् अझ नं विवाद पिकयाच्वंगु दनि । सरकारय् पार्टी सभापति सुजाता कोइरालायात छ्वत धकाः पिहां वःगु आन्तरिक कचवंया बाखं ला अलग्ग हे दनि ।
थज्याःगु स्थितिइ माधव नेपालया सरकार ग्वःन्हु चले जुइ धइगु खँय् सर्वसाधारण जनतां तकं न्ह्यसःचिं तया हःगु दु । माधव नेपालया सरकारयात माओवादीं दुःख बी जिक्व बियाः अस्थिर याना बी धकाः अनुमान जुयाच्वंगु खः । तर सरकारयात माओवादीं छुं याये म्वायेक थः हे अस्थिर जुयाच्वंगु दु । सरकारय् दुहां वयाच्वंगु घटकतय् दुने हे ल्वापु व विवाद जुयाः सरकारं ज्या याये फयाच्वंगु मदुनि । प्रधानमन्त्रीया रुपय् भाजु नेपालं शपथ ग्रहण याःगु बाःछि दयेधुंकलं नं सरकारया लगाम तक हे ज्वने फुगु मदुनि । ब्वाकेगु ला तापाःगु हे खँ तिनि । थुकिं मुक्कं नेपाःयात हे विश्वया न्ह्यःने तसकं बेइज्जत याना बिउगु दु । विश्वं पत्याः यायेगु त्वःतल धाःसा नेपाः बुलुहुँ 'फेल्ड स्टेट’ जूवनीगु लँय् वनीगु निश्चित दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
