द्वाल्खामि नेवाःतय् न्हापांगु मुँज्या
यें (सन्ध्या टाइम्स) / द्वाल्खा नेवाः भाय् ल्हाईपिं नेवाःतय् न्हापांगु मुँज्या वंगु शनिवाः येँय् जुल । द्वाल्खा नेपालभाषा खलकया ग्वसालय् जूगु उगु मुँज्याय् देय्या स्वंगू जिल्लाया न्यागू गाविस व छगू नगरपालिका यानाः करिब ६० म्ह द्वाल्खा नेवाःतय् उपस्थिति दुगु खः । मुँज्याय् द्वाल्खा तौथल लिस्ति जेठल नापं जःखः च्वंगु स्याउले व टेकनपुरया नेवाःतय्सं नं ब्वति काःगु खः ।
आः नकतिनि द्वाल्खा भासं म्ये हालातःगु न्हापांगु म्येचाः 'स्याउदाइ' पिहां वःगु खःसा थ्वपाखें हे जागृत जुयाः आः द्वाल्खा भाय् ल्हाईपं नेवाःतय्गु उगु मुँज्या जूगु खः । उगु मुँज्या नं 'स्याउदाइ' सीडी पिकयादीम्ह भाजु त्रिलोचन प्रधानया हे पहलय् जूगु खः । ज्याझ्वलय् ब्वति काःपिं द्वाल्खामि नेवाःतय्सं मुँज्या जूगु न्हियात ऐतिहासिक न्हि खः धासें द्वाल्खाया नेवाः भाय् म्वाका तयेगु लागिं निरन्तर कुतः जुयाच्वनेमाःगु बिचाः प्वंकादीगु खः । ज्याझ्वलय् द्वाल्खाया नेवाः व्यक्तित्विपं मुक्ति प्रधान नहेन्द्र प्रधान कुमार श्रेष्ठ व विष्णुभक्त श्रेष्ठिपंसं न्ववानादीगु खः । वय्कःपिंसं द्वाल्खाया नेवाः भाय् म्वाका तयेत छुं याये धइगु आह्वान यानादीगु खः ।
नेपालय् द्वाल्खा नेवाः भाय् ल्हाईपं नेवाःतय् ल्याः ५० निसें ६० द्वः दयेमाःगु अनुमान दु । द्वाल्खा भाय्यात येँय् ल्हाइगु नेवाः भाय्या पुलांगु स्वरुपया रुपय् कायेगु याः । थुकियात कयाः आपाःस्यां अनुसन्धान नं यायेधुंकूगु दु । वर्तमान संविधानसभाय् द्वाल्खा नेवाः भाय् ल्हाईपं निम्ह सभासद् हेम श्रेष्ठ व राजकुमार श्रेष्ठ नं थ्यनाच्वंगु दु ।
