नेपाल प्रहरीया २३ म्ह महानिरिक्षकय् कुवेरसिंह राना नियुक्त

नेपाल प्रहरीया नीस्वम्हम्ह महानिरिक्षकय् कुवेरसिंह राना नियुक्त जुयादीगु दु । सिंहदरवाय् विहीवाः च्वंगु मन्त्रिपरिषद्या मुंज्यां वरिष्ठताया लिधंसाय् प्रहरी अतिरिक्त महानिरिक्षक रानायात प्रहरी महानिरिक्षकय् वढुवा यायेगु निर्णय याःगु खः ।

प्रहरी महानिरिक्षक जुइगु नितिं अतिरिक्त महानिरिक्षक कुवेरसिंह राना, भिष्म प्रसाईं व नवराज ढकालं धेंधेंबल्ला यानादीगु खः । रानायात प्रधानमन्त्रीं प्रमुख दयेकेत स्वःगु खःसा प्रसाईंयात उपप्रधानमन्त्रीं प्रमुख दयेकेत स्वयाच्वंगु खः । प्रधानमन्त्री व उपप्रधानमन्त्रीया खँ मिलेमजुइवं महानिरिक्षक नियुक्त यायेत लच्छि लिवाःगु खः । गुकिंयाना लच्छि न्ह्यः हे विदाय् च्वनेमाःम्ह महानिरिक्षक रवीन्द्रप्रताप शाह लिपांगु दिं तक हे ज्याकुथिइ वया ज्या यायेमाल । बरिष्ठताया लिधंसाय् रानायात महानिरिक्षक यायेमाःगु अडान काःम्ह प्रधानमन्त्रीं यक्वः हे कसरत यायेमाल रानायात महानिरिक्षक दयेकेत । थुलितक कि प्रधानमन्त्रीं उपप्रधानमन्त्री विजयकुमार गच्छदारयात ‘कि रानाया प्रस्ताव स्वीकार याः मखुसा राजिमाना ज्वना वा’ तकं धायेमाल ।

न्हुम्ह नियुक्त महानिरिक्षक रानां बिहीवाः हे थःगु ज्या कःघानादीगु दु । बिहीवाः बढुवा जुयादीम्ह महानिरिक्षक रानाया आः झिंस्वलाया कार्यकाल जुइ । बिहीवाः हे महानिरिक्षक शाहयात बिदाइ याःगु खः ।

News Location:

Related Stories

नवनियुक्त महानिरीक्षक रानायात दर्ज्यानी चिं लःल्हात