गणतन्त्रवादी नेता मन्त
गणतन्त्रवादी नेता रामराजाप्रसाद सिंह बुधवाः सुथय् मन्त । तःच्वः जुयाच्वंम्ह वय्कः निवाः न्हयःनिसें त्रिबि शिक्षण अस्पताय् भर्ना जुयाच्वनादीम्ह खः ।
जँक्वय्या भाग संकेमज्यूगु, धुसःक्वँय् स्याइगु, लुमंकेगु शक्ति तनावनीगु थेंजाःगु ल्वचं कयाच्वंम्ह वय्कःयात सघन उपाचार कक्ष (आईसीयू)स तया वासःयानाच्वगु खःसा ७७ दँया बैंसय् मदुगु खः ।
सिंह मदुगु सीसातकि प्रधानमन्त्री बाबुराम भट्टराई व एमाओवादी नायः प्रचण्ड शिक्षण अस्पताल थ्ययंकूगु दु । मदुम्ह वय्कःयात राजकीय सम्मानलिसें सिथं यनीगु धाःगु दु । थुकिया लागि मन्त्रीपरिषद्या मुँज्या च्वनेत्यंगु दु ।
रामराजा प्रसाद सिंह माओवादीपाखें नेपाःया न्हापांम्ह राष्ट्रपतिया लागि उम्मेदवार जुयादीम्ह खः । नेपालय् गणतन्त्र पलिस्थाया निंतिं बि.सं.२०४२ सालय् नारायणहटी दरवार न्ह्यःने, सिंहदरवार जःखः व देय्या मूमू थासय् बम मुइकूम्ह खः । उघ्रिमय तत्कालीन पंचायती शासकतय्सं वय्कःयात मृत्युदण्डया सजाय न्यंकूगु खः।
