पेट्रोलियम पदार्थया मूल्यवृद्धिया व्यापक विरोध
सरकारं पेट्रोलियम पदार्थय् याःगु मूल्यवृद्धिया देय्व्यापी रुपय् विरोध प्रदर्शन जूगु दु । बजारय् खनेदुगु हाकुगु बजाः व मूल्यवृद्धि नियन्त्रण यायेगु पलेसा झन् सर्वसाधारण जनताया दुगः क्वँय् त्वथुलेगु कथं पेट्रोलियम पदार्थय् मूल्यवृद्धि याःगु धासें प्यख्यरं विरोध प्रदर्शन तच्वयाः वःगु खः ।
मूल्यवृद्धिया विरोधय् नेकपा-माओवादीं मंगलवाः येँया रत्नपार्कय् पद्रशर्न याःगु खः । शान्ति वाटिकापाखे पिहावंगु माओवादी जनवगीर्य संगठन लिसे जातीय मोर्चातय्गु हे जुलुस भृकुटीमण्डप पद्मोदय मोड बागबजार जुयाः हाकनं शान्ति वाटिकाय् थ्यंकाः कोणसभाय् हिउगु खः ।
कोणसभाय् न्ववासें अखिल क्रान्तिकारीया पुलांम्ह नायः लेखनाथ न्यौपानें सर्वसाधारणतय्त महंगी विरोधी आन्दोलनय् ब्वति कायेत इनाप नापं याःगु खः । नेकपा-माओवादीया जनवर्गीय संगठन व मोर्चातय्सं बुधवाः साल्ट ट्रेडिङ्ग खाद्य संस्थान व नेपाल आयल निगम घेराउ नापं याःगु खः । उगु घेराउ ज्याझ्वः सुथसिया गुताः इलंनिसें झिंछताः ईतक्क उगु ज्याकू न्ह्यःने धर्ना बीगु ज्या न्ह्याकूगु खः ।
अथेहे प्रतिपक्ष राजनीतिक दल सम्बद्ध युवा विद्यार्थीतय्सं याकनं मुल्यबृद्धि लित कायते माग यासें स्वनिगः बन्द लगायतया आन्दोलनलय् न्हूँगु ज्याझ्वः घोषणा याःगु दु । नेकपा-माओवादी निकट विद्यार्थी संगठन अखिल क्रान्तिकारी लिसें गुगूं विद्यार्थी सगंठनं सरकारयात मगं लवाः तक्क मुल्यबृद्धि लित कायते अल्टिमेटम नापं ब्यूगु खःसा तर उकिया सुनुवाई जूगु मदु ।
विद्यार्थी संगठनतय्सं मंगलवाः हे प्रधानमन्त्रीयात नापलानाः अल्टिमेटम बीत स्वःसां नं प्रधानमन्त्रीं ई मबीवं सिंहदरबारया मू लुखाय् ज्ञापन पौ तिकाः लिहांवःगु खः । मूल्यवृद्धिया विरुद्ध वइगु भदौ २४ गते स्वनिगः बन्दया इनाप याःपिं उमिसं बुधवाः येँया रत्नपार्कय् सतकय् अन्तरकि्रया २१ गते क्याम्पस न्ह्यःने चक्का जाम यायेगु २२ गते सरकारी लिसे भारतीय नम्बर प्लेटया गाडी निषेध यायेगु व २३ गते मशाल जुलुस प्रदर्शन यायेगु ज्याझ्वः विद्यार्थी संगठनतय्सं क्वःछ्यूगु खः ।
