एकीकृत माओवादीया कार्यकर्तापाखें ज्यान कायेगु ख्याच्वः
एकीकृत नेकपा माओवादीया कार्यकर्तातय्सं येँया महांकालय् दुगु भरत कार्पेटय् ज्या यानाच्वंपिं मजदुरतय्त ज्यान कायेगु ख्याच्वः ब्यूगु दु । शनिवाः सुथय् प्यताः इलय् ज्या यायेत कारखानाय् थ्यंपिं मजदुरतय्त एकीकृत माओवादीया कार्यकर्ता छत्र राई लगायतया पुचलं ज्यान कायेगु ख्याच्वः ब्यूगु खः ।
थ्यंमथ्यं नीम्हसिया ल्याखय् दुपिं एकीकृत माओवादीया कार्यकर्तातय्गु पुचलं छुं मिसा मजदुरत दथुइ ल्हाःवायेगु ज्या नापं याःगु मजदुरतय्सं न्ह्यःथंगु दु । कारखानाया सञ्चालकं थः मजदरतय्सं ज्या यायेदयेमाःगु धायेवं एकीकृत माओवादीया कार्यकर्तातय्सं ज्याय् मछ्यलेत दवाब ब्यूगु मजदुरतय्गु धापू दु । अनं ज्या यानाच्वंपिं मजदुरतय्गु बहुमत दुजःत अखिल नेपाल क्रान्तिकारी गलैँचा मजदुर संघय् संगठित जुइधुंकाः उमिसं आक्रमणया कुतः याःगु संगठनया न्वकु प्रतिमा बजगाईं जानकारी बियादीगु खः ।
उगु कम्पनीइ एकीकृत माओवादी निकट अखिल नेपाल गलैँचा मजदुर संघय् आबद्ध आपालं मजदुरत विद्रोह यानाः क्रान्तिकारी गलैँचा मजदुर संघय् आबद्ध जुइधुंकाः एकीकृत माओवादीया कार्यकर्तात भौतिक आक्रमणय् कुहांवःगु खः ।
