न्हूगु पहलं मल्लया उपन्यासया पितब्वज्या

नेपालभाषा एकेडेमिया चान्सलर सत्यमोहन जोशी व लुम्बिनी बौद्ध विश्वविद्यालयया उपकुलपति त्रिरत्न मानन्धरं कम्प्युटरया बटन तियाः नेवाः न्ह्यलुवाः मल्ल के. सुन्दरया न्हूगु उपन्यास "व लँपु : थ्व पलाः"या विमोचन यानादीगु दु । बौद्ध विनय व सशस्त्र विद्रोह दथुइया छगू औपन्यासिक अन्तरसंवादयात न्ह्यथनातःगु सफूया मुंक ब्वः कम्प्युटरया बटनं पुइकाः जोशी व मानन्धरं विमोचन यानादीगु खः ।

ज्याझ्वलय् मूपाहाँ चान्सलर जोशीं नेपालभाषा ख्यलय् थुलि च्वछाय् बहः जुइक च्वयातःगु सफूयात खस भासं व अग्रेजी भासं नं भाय् हीकाः नेपालभाषाया साहित्य गुलि बल्लाः धकाः क्यनेमाःगु खँ न्ह्यथनादिल ।

नेपालभाषा मिसा खलःपाखें ग्वसाःग्वःगु ज्याझ्वलय् मेम्ह मूपाहाँ उपकुलपति मानन्धरं छम्ह मिजंम्ह मनूखं मिसातय् भावनायात पिज्वइगु कथं उपन्यासया पात्रत दयेकूगु धइगु प्रंशासनीय खँ जूगु धयादिल ।

उपन्यासया बारे ध्वाथुइकादिसें च्वमि मल्लं नेपाः छगू शान्तिप्रिय मनूत व वीर गोर्खालीतय् देय् जूगुलिं अहिंसात्म लँपु व सशस्त्र संघर्ष यानाच्वपिं निम्हेसित उपन्यासय् मू भूमिकाय् न्ह्यथनागु धयादिल । वय्कलं मुक्तिया लँपु मालाच्वंपिं बौद्ध भिक्षुणी व सशस्त्र युद्धया छापामार दथुइया अन्तरसंवाद् हे उपन्यासया मू विषयवस्तु जूगु धयादिल ।

भावना पिथना प्रकाशनया लुखाँ पिदंगु उगु उपन्यासयात कयाः प्रो. प्रेमशान्ति तुलाधर व प्राज्ञ रीना तुलाधरं समिक्षात्मक टिप्पणी यानादीगु खः । मिसा खलःया नायः मंगला कारंजितया सभापतित्वय् जूगु ज्याझ्वलय् भावना पिथनाया श्रीलक्ष्मी श्रेष्ठं नं थःगु नुगः खँ प्वंकादीगु खः । ज्याझ्वःयात मिसा खलःया छ्याञ्जे उर्मिला डंगोलं लसकुस यानादीगु खः ।