नेपालभाषाय् अप्वः ल्याः हःपिंत शान्ति सिरपाः
नेपालभाषाया माध्यमं आखः ब्वंकीगु नेपाःया न्हापांगु ब्वनेकुथि जगत सुन्दर ब्वनेकुथिपाखें २०६८ सालया एस.एल.सी परीक्षाय् नेपालभाषा विषय कयाः दकलय् अप्वः ल्याः हयादीपिं निम्ह विद्यार्थीपिंत शान्ति सिरपाः लःल्हात।
ब्वनेकुथिइ जूगु ज्याझ्वलय् मूपाहां नेपालभाषा आकादेमिया चान्सलर डा. सत्यमोहन जोशीं ब्वनेकुथिपाखें नेपालभाषा विषय कयाः दकलय् अप्वः ल्याः हयादीपिं भाजु शिराज मलिक शाक्य व मय्जु मेरिना वज्राचार्ययात पदक व दसिपौ लःल्हानादीगु खःसा दाताया छेँजःपाखें मय्जु लक्ष्मीमाया मानन्धरं दां लःल्हानादीगु खः ।
मूपाहांया थासं चान्सलर जोशीं नेपालभाषा विषयय् विद्यार्थीतय्सं म्हो जक ल्याः हःगु खँय् चिउताः प्वंकादिसें थ्व विषय ब्वंकीपिं व ब्वनीपिंसं बांलाक ध्यान बीमाः धयादिल ।
ज्याझ्वःया सभापतिया थासं जनकवि दुर्गालाल श्रेष्ठं झीसं मेपिंत शत्रु खंकेगु मखसे झीपिं हे झी दथुइ शत्रु जुयाच्वंगुलिं दकलय् न्हापां उकियात पितिनेमाः धयादिल।
प्रिन्सिपल माया मानन्धरं ब्वनेकुथिया विद्यार्थीतय् अवस्थायात कयाः जानकारी बियादीगु खःसा सिरपाःया दाता शान्ति मानन्धरं सिरपाःया उद्देश्ययात कयाः थःगु नुगः खँ प्वंकादीगु खः ।
ज्याझ्वलय् ब्वनेकुथिया संस्थापक अनाररत्न वज्राचार्य, पुलांम्ह सभासद बुद्ध साय्मि, नेवाः देय् दबूया नायः नरेश ताम्रकार व ज्ञानेन्द्र मानन्धरं नं थःथःगु नुगः खँ प्वंकादीगु खः ।
संस्कृतिविद् डा. चुन्दा वज्राचार्यं लसकुस उगु ज्याझ्वलय् थः अबु बिरञ्चीनारायण व मां मोतिमाया मानन्धरया नामं वय्कःया काय्पिं गुहेश्वरीराज मानन्धर, शिक्षाविद् बुद्धशरण मानन्धर, डा. धर्मशरण मानन्धर व छय् अशोक मानन्धरपिंसं छात्रवृत्तिया निंतिं प्रिन्सिपल माया मानन्धरयात दां लःल्हानादीगु खः ।
