पहिचान मदुसा झी राज्यविहीन जुइ : मल्ल
नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं पहिचान बिनाया संघीयता वःसा झी राज्यविहीन अवस्थाय् लाइगु खँ धयादीगु दु ।
नेवाः जागरण मञ्चं पहिचान सहितया संघीय प्रदेश निर्माण आन्दोलनयात कयाः शनिवाः याःगु छगू ज्याझ्वलय् मल्लं झीसं आः माग यानाः च्वंगु व्यक्तिगत अधिकार मखसें सामुहिक पहिचानया अधिकार जूगु धयादिल ।
वय्कलं धयादिल, ‘सामुहिक पहिचानया अधिकार प्रत्याभुत मजूसाः झीत सामुहिक रूपया संवैधानिक अधिकार दइमखु, अथे जुइगुलिं सामूहिक पहिचान मदुसा झी राज्यविहीन जुइ ।’
बहुलता व विविधतायुक्त समाजय् व्यक्तिगत पहिचान जक मखु सामूहिक पहिचान नं दइगु खँ धयादिसें नेवाः न्ह्यलुवाः मल्लं मेगू समुदाय स्वयां पाक्कः च्वने दइगु झीगु सामुहिक पहिचानया अधिकार धइगु मानव अधिकारया खँ जूगु न्ह्यथनादिल ।
अथेहे नेकपा (एमाले)या केन्द्रीय दुजः राजेन्द्र श्रेष्ठं प्रमुख राजनीतिक पार्टीतय्सं आः पहिचान सहितया संघीय व्यवस्थाया माग ल्ह्वने मफइगुलिं वैकल्पिक राजनीतिक शक्तिया आवश्यक जूगु न्ह्यथनादिल ।
वय्कलं कांग्रेस व एमालेया असन्तुष्ट नेतात दथुइ न्हूगु वैकल्पिक शक्तिया निर्माण यायेत आवश्यक सहलह जुयाच्वंगु न्ह्यथनादिसें याकनं हे फुक्कसित कघायेफइगु कथंया न्हूगु शक्ति पार्टी कथं स्थापना जुइगु दावी यानादिल ।
वय्कलं उगु पार्टी नेपाःया अग्रगामी परिवेशय् निर्माण जुइगु जूगुलिं उकीया मूल मर्म संघीयायात संस्थागत यायेगु कथं जुइगु न्ह्यथनादिल ।
नेवाः जागरण मञ्चया न्वकु विजयकृष्ण श्रेष्ठं लसकुस यानादीगु ज्याझ्वलय् मञ्चया नायः सुजीव वज्राचार्यं सुभाय् बियादीगु खः ।
