गच्छदार लिकया छ्वयेत प्रमयात फोरमया इनाप
यें (सन्ध्या टाइम्स) / उपेन्द्र यादवया नेतृत्वय् दुगु मधेशी जनअधिकार फोरमं म्हिगः प्रधानमन्त्री माधव नेपालयात नापलानाः विजय गच्छदार आः फोरमया सभासद मखुगु कारणं वय्कःयात फोरमपाखें वःम्ह नेताया रुपय् उपप्रधानमन्त्री दयेके मते धकाः आह्वान याःगु दु । गच्छदारयात फोरमं निष्काशन याये-धुंकूगु कारणं आः वय्कःयात फोरमं वःम्ह धइगु हैसियत बीमिछंगु दावी नं फोरम नेतातय्सं याःगु खः ।
लिसें फोरम नेतातय्सं म्हिगः हे सभामुख सुभाष नेम्बाङयात नं नापलानाः थःपिंसं सरकारयात बियागु समर्थन लित कयागु जूगुलिं थःपिं आःया संसद बैठकय् विपक्षी बेंचय् च्वनेगु जानकारी बिल ।
थःपिं विपक्षी बेंचय् च्वनेगु जूगुलिं संसदय् थःपिनि लागिं उकथं हे सीट व्यवस्था याना बीत नं फोरम नेतातय्सं सभामुखयात इनाप याःगु खँ सीदुगु दु ।
