भिंद्यःया देगलय् लुँया गजू छुत
हेटौंडा (सन्ध्या टाइम्स) / हेटौंडा नगरया मू थाय् हेनपा १० मेनरोडया भिंद्यः देगलय् परम्परागत धार्मिक विधि कथं पूजापाठ यानाः लुँया गजू छुइगु ज्या जुल ।
वंगु बुधवाः कुन्हु भिंद्यः निर्माण समितिया नायः रुद्रहरि जोशी व दुजःपिनि सहभागिताय् पुरोहित मार्कण्डयेराज राजोपाध्यायं धार्मिक विधिवत् पूजापाठ यानाः देगलय् गजू छूगु खः ।
नीन्यागू लाखंनिसें स्वीगू लाख तकाया लागतय् देगः निर्माणया ज्या पूवंकेगु ताः तयाः २०६५ श्रावण ३ गतेनिसें पुनर्निर्माण शुरु याःगु भिंद्यः देगलय् आःतक न्हय्न्यागू प्रतिशत निर्माणया ज्या पूवनेधुंकूगु खँ कनादिसें निर्माण समितिया छ्यान्जे भीमहरि जोशीं थ्वहे वइगु २०६६ सालया मोहनि तकया दुने निर्माणया ज्या क्वचायेकाः भिंद्यः देगलय्
सारे यायेगु बिचाः जुयाच्वंगु खँ 'सन्ध्या टाइम्स'यात कनादिल । देगः निर्माणया ज्याय् आःतक १६/१७ लाख दां खर्च जुइधुंकूगु व मेगु मगाः मचाःगु खर्चया निंतिं दातातय्त इनाप यानाच्वनागु खँ नं वय्कलं कनादिल ।
हेटौंडाय् मानववस्ती शुरु जुइ धुंका: छुं दँ लिपा व्यापारीतय् आगमन जुइधुंका:लि २००४ सालं भीमफेदीया मदुम्ह कृष्णलाल जोशीया थःगु हे जग्गाय् निजी खर्चं व्यापारीतय् आराध्यदेव भिंद्यः व भिंद्यःया देगः दयेकेगु ज्या जूगु खः । आः वयाः उगु देगः जीर्ण अवस्थाय् लानाः पुलांगु पुरातात्विक बास्तुकलां जाःगु नेवाः परम्परागत पगोडा शैलीं दयेकूगु थुगु देगलं हेटौंडा नगर हे शोभनीय जुइगु व हेटौंडाया छगू नमूना देगःया रुप काये फइगु बिचाः यक्वस्यां प्वंकेगु यानाच्वंगु दु ।
