कन्हय्निसें रात्री यातायात सेवा, बहनी ८ निसें ११ ताःतक्क
शुक्रवाःनिसें स्वनिगलय् सञ्चालन जुइगु रात्री यातायात सेवाया फुक्क तयारी पूवंगु दु । थौं येँ महानगरपालिकां छगू पत्रकार सम्मेलनया ग्वसाः ग्वयाः शुक्रवाःनिसें स्वनिगःया येँ व यल जिल्लाय् न्ह्याइकथं झिंप्यंगः रात्री बस सञ्चालनया तयारी पूवंगु जानकारी ब्यूगु खः । येँ महानगरपालिका व नेपाल यातायात राष्ट्रिय महासंघया मंकाः कुतलय् बहनी च्याताः इलंनिसें झिंछताः ईतक्क रात्री बस सञ्चालन यायेत्यंगु खः ।
झिंप्यंगः मध्ये प्यंगः बसं चक्रपथ परिक्रमा याइसा मेमेगु झिगः बस धाःसा येँ व यलया थीथी दुनेया थासय् सञ्चालन जुइ । वीर अस्पतालपाखें न्ह्यानाः शहीदगेट, कालीमाटी व कलंकी रुट वये वनेगुलिइ निगः बस सञ्चालन जुइ । अथेहे वीर अस्पतालपाखें न्ह्यानाः भृकुटी मण्डप, ज्ञानेश्वर, पुलां बानेश्वर जुयाः जोरपाटी वये वनेगुलिइ निगः बस लिसे वीर अस्पतालपाखें हे सिंहदरबार, बबरमहल, तीनकुने, सिनामंगल, कोटेश्वर जुयाः उगु हे रुटपाखें लिहांवनेगु कथं निगः बस सञ्चालन जुइगु महानगरपालिकां जानकारी ब्यूगु खः ।
ल्यं दुगु निगः बस वीर अस्पताल, सिंहदरबार, थापाथली, पूच्व, जावलाख्यः, यल जुयाः सातदोबाटो वये वनेगु रुट कायम याःगु दु । यात्रुतय्सं सुरक्षायात ध्यानय् तयाः प्रत्येक सवारी साधनय् ल्वाभःलिसेया निम्ह सुरक्षाकःमि दइगु धाःगु दु । अथेहे बसय् सीसी क्यामरा जडान यानातःगु व बस स्टेशनय् सुरक्षा व्यवस्था तच्वयेकूगु येँ महानगरपालिकाया प्रमुख कार्यकारी अधिकृत केदारबहादुर अधिकारीं जानकारी बियादिल ।
