विकास बैंकय् हस्तक्षेप बाध्यात्मक
यें (सन्ध्या टाइम्स) / नेपाल विकास बैंकयात सुधारया निंतिं सचेत यानां नं उगु अवस्थाय् सुधार मजूगुलिं थःपिंसं वाध्यात्मक परिस्थितिइ व्यवस्थापनय् हस्तक्षेप यायेमाःगु खँ नेपाल राष्ट्र बैंकया गभर्नरं धयादीगु दु ।
थन जूगु खराब कर्जा असुल सम्बन्धी छगू अन्तरक्रिया ज्याझ्वलय् न्ववासें गभर्नर दिपेन्द्र बहादुर क्षेत्रीं थःपिंसं नेपाल विकास बैंकया अनुगमन यानागु ईया अवस्था तसकं खराब जूगुलिं राष्ट्र बैंकं हस्तक्षेपया लँपु नालेमाःगु खः धयादिल ।
वय्कलं यदि स्थिति खराब जुयाच्वंगु बैंकय् राष्ट्र बैंकं तत्काल छुं मयात धाःसा उकिया लिच्वः मेमेगु बैंकयात नं लायेफुगुलिं नं नेपाल विकास बैंकय् थुकथंया कडा पलाः ल्ह्वनेमाःगु स्पष्ट यानादिल ।
लिसें वय्कलं भिंगु मति दुपिं खराब ऋणीतय्त त्यासा पुलेगु ह्वःताः बीमाः धयादिसें नियत स्पष्ट जुइ धुंकाः जक ऋण प्रवाह यात धाःसा थुकिं तःधंगु समस्या ब्वलनीगु सम्भावना तसकं म्हो जुइ धयादिल ।
गभर्नर क्षेत्रीं पुष्पकमल दाहालया नेतृवय् दुगु सरकारं तत्काल खराब ऋण म्हयेगु ल्याखं समिति दयेकूगु खःसां उगु समितिया ज्या खासा पलाः थें जक जुयाच्वंगुलिं आः उकियात गति बीमाःगु बिचाः नं प्वंकादिल ।
नेपाल विकास बैंकया लगानीकर्ता प्रति सहानभूति क्यँसें गभर्नर क्षेत्रीं राष्ट्र बैंक फत्तले स्थितिया मूल्यांकन यायेत तयार दुगु नं खँ कनादीगु दु ।
उगु हे ज्याझ्वलय् न्ववासें नेपाल बैंकर्स एशोसियसनया उपाध्यक्ष लिसें नविल बैंकया प्रमुख कार्यकारी अधिकृत अनिल शाहं त्यासा बिउगु इलय् बांलाक बिचाः मयाःगु व अव्यवस्थित रुपं त्यासा बीगु ज्या जूगुलिं नं खराब कर्जाया ल्याः अप्वया वनाच्वंगु खँ कनादिल ।
शाहं सक्षम व गुणस्तरीय बैंकस्रया अभाव जूगुलिं नं बैंकया स्थिति इलय् ब्यलय् खराब जुइगुया नापं जोखिमय् लाइगु खँ कनादिल ।
नेपाल विकास बैंकया स्थिति खराब जुया वनेवं नेपाल राष्ट्र बैंकं वंगु वालय् उगु बैंकया व्यवस्थापनय् हस्तक्षेप याःगु खः ।
