बाखंयात कयाः अन्तरक्रिया ज्याझ्वः
नेपालभाषा परिषदया ग्वसालय् शुक्रवाः परिषदया हे ज्याकुथिइ नःलि मिसा बाखं च्वमि मन्जु मास्के व दिव्या ताम्रकारपिन्सं न्ह्यब्वयादीगु बाखंयात कयाः अन्तरक्रिया ज्याझ्वः जुल । ज्याझ्वलय् न्ह्यब्वःगु बाखंयात कयाः समालोचक ध्रुब मधिकःमिं समालोचना यानादीगु खः ।
परिषदया नायः फणिन्द्र रत्न बज्राचार्यया सभाध्यक्षताय् जूगु उगु ज्याझ्वलय् मूपाहां कथं नेपाल प्रज्ञा प्रतिष्ठानया मातृभाषा विभागया संयोजक प्राज्ञ सुलोचना मानन्धर झायादीगु खः ।
नेपालभाषा नापं खस भाय्या न्हापांम्ह आधुनिक बाखंया च्वमि नापं नेपालभाषाया आजीवन दांभरि मोतिलक्ष्मी उपासिकाया किपाय् सभानायः बज्राचार्य व मूपाहां मानन्धरं स्वां देछाया न्ह्याःगु उगु ज्याझ्वलय् प्रा। सुवर्ण शाक्यं लसकुस यानादीगु खःसा दुजः मदनसेन बज्राचायै सुभाय् देछानादीगु खः ।
नेपालभाषाया आपालं पुलांपिं व न्हूपिं च्वमिपिनिगु उपस्थिति दुगु उगु ज्याझ्वलय् ज्याझ्वःयात कयाः छ्यान्जे नविन चित्रकारं ध्वाथुइकादीगु खः ।
