मिसा खलःया २३ दँ बुन्हि तःजिक हन
नेपालभाषा मिसा खलःया २३ दँ बुन्हि विहिवाः छगू ज्याझ्वः यासें तःजिक हंगु दु ।
खलःया नायः मंगला कारन्जितया सभाध्यक्षताय् जूगु उगु ज्याझ्वलय् ७५ दँ पूवंपिं निम्ह आजीवन जः कवयित्री नारायणदेवी श्रेष्ठ व सत्यभामा माथेमापिन्त मूपाहां नापं नेवाः देय् दबूया नायः नरेश ताम्रकारं हनापौ लःल्हानादीगु खःसा विशिष्ट पाहां नेपालभाषा एकेदमिया चान्सलर सत्यमोहन जोशीं पिलंगा न्ययेकाः हनादीगु खः । ज्याझ्वलय् कवयित्री नारायण देवी श्रेष्ठ उसाँय् मदुगुलिं उपस्थित जुयादीमफूगु खः ।
अथेहे च्वमि जुही बज्राचार्य सुवालं नीस्वनादीगु "चम्पा-टंक विलास-बिजु नेवाः सिरपाः" थुगुसी गोरखा आरुघाट नेपालभाषा मिसा खलःया नायः पार्वती श्रेष्ठयात हनापौ लिसें स्वीन्याद्वः तका लःल्हानादीगु खःसा न्हापांगु "चम्पा-टंक विलास-बिजु नेवाः हःपाः सिरपाः" शोधबृत्ति नेपालभाषाय् एम.एम. ब्वनाः शोधग्रन्थ च्वइम्हेसित बीगु कथं थुगुसी विमलप्रभा बज्राचार्ययात झिन्याद्वः तका लिसें दसिपौ बियाः हंगु खः ।
ज्याझ्वलय् थुगुसी १०१ म्ह सफल उद्यमी सिरपाः कयादीपिं आजीवन दुजः अन्जना ताम्रकार, रेणु तुलाधर आदिपिन्त नं हनेज्या जूगु खः ।
ज्याझ्वलय् डान्स कल्चरल आर्ट सेन्टर व म्यूजिक फक्सपाखें थी थी साँस्कृतिक ज्याझ्वः न्ह्यब्वःगु खः ।
