जनवादी व्यवस्था नीस्वनेत न्हूगु पार्टी
नेपालय् सामान्ती राज्यसत्ताया अन्त्य यासें सर्वहारा वर्गया नेतृत्वय् जनवादी राज्य सत्ता नीस्वनेगु ताः तयाः स्वंगू चीधंगु पार्टीत छप्पँ जूगु दु । नेकपा माओवादी क्रान्तिकारी, नेकपा राष्ट्रवादी व नेपाल जन श्रमिक पार्टीं सोमवाः छगू पत्रकार सम्मेलन यानाः जनयुद्ध मार्फत वर्तमान सामन्ती व्यवस्था क्वःथला जनवादी व्यवस्था हयेत थःपिं छप्पँ जुयाःगु खँ धाःगु दु ।
उगु पार्टीं वइगु मंसिर १५ गते निसें २१ गते तक पार्टीया एकता महाधिवेश यायेगु घोषणा नं पत्रकार सम्मेलन मार्फत याःगु दु । छप्पँ जूगु न्हूगु पार्टीया नां नेकपा माओवादी (क्रान्तिकारी) तःगु दुसा न्हूगु पार्टीया नायः जनपथं राज्य सत्ता बन्दुकया नालं जक दइगु व सामन्ततय्गु राज्यसत्तायात पूर्ण रूपं ध्वस्त याना न्हूगु जनवादी राज्य व्यवस्था नीस्वनेगु हे पार्टीया राजनीतिक आजु जूगु खँ कनादिल ।
