शक्तिशाली दलया आवश्यकता : नेता राई
नेकपा एमालेया न्वकू अशोक राईं नेपाःया राजनीतिइ शक्तिशाली दल चायेत्यंगु धयादीगु दु ।
नेपाल आदिवासी जनजाति पत्रकार संघया निक्वःगु राष्ट्रिय भेला नापं प्रशिक्षण ज्याझ्वःया आइतवाः उलेज्या यानादिसें नेता राईं उगु खँ धयादीगु खः । वय्कलं नेपाःया जनतां वैकल्पिक शक्तिया कथं अलग्ग हे परिपक्व दल मालाच्वंगुलिं उकियात सार्थकता बीत थःपिं अन्तिम तयारीया लागि न्ह्यज्यानाच्वनागु धयादिल ।
नेता राईं प्रमुख दलया नेतात एकात्मक व यथास्थितिवादी सोचया कारणं देशयात अन्यौलग्रस्त अवस्थाय् थ्यंकूगु द्वपं बियादिसें आःया परिस्थितिइ पहिचान, समानता व न्यायका पक्षधरत छप्पँ जुइमाःगु खँय् बः बियादिल ।
थ्वहे झ्वलय् नेता राईं हिलावनाच्वंगु परिस्थितिइ राजनीतिक समस्या ज्यंकेगु लागि सर्वदलीय व सर्वपक्षीय सहमति यानाः संविधानसभाया चुनाव यासें संविधान जारी यायेमाःगु धयादिल । नेपाःया संचार माध्यमत आः नं निष्पक्ष व समावेशी जुइमफूगु नेता राईया धापू दु ।
ज्याझ्वलये नेपाल पत्रकार महासंघया नायः शिव गाउँलें नेपाःया संचार माध्यमयात समावेशी दयेकेत महासंघं संचार माध्यमया संस्थागत भौतिक व नीतिगत संरचनाय् हे सुधार यायेत सकसित घ्वानाच्वनागु जानकारी बियादिल ।
वइगु सोमवाः तक न्ह्याइगु उगु मुँज्याय् देय्न्यंक थी थी जिल्लाया ४० म्ह स्वयां अप्वः जनजाति पत्रकार प्रतिनीधितय्गु ब्वति दु ।
