विदेशी नां दुगु शिक्षण संस्थाया नां हिइकेत निर्देशन
शिक्षा विभागं विदेशी नां छ्यला वयाच्वगु शैक्षिक सस्थायात खुला ई दुने नां हिइकाः राष्ट्रियता झल्के जुइगु कथं ना तयेत निर्देशन ब्यूगु दु । कम्पनी रजिष्ट्रारया ज्याकुथिइ तकं शैक्षिक सस्थाया नां हिइकेगु निंति पत्राचार यायेधुंकूगु खँ विभागया निर्देशक टेकनारायण पाण्डे धयादीगु दु ।
नेपालया शिक्षा ऐन व नियमावली कथं नेपालया मौलिकता झल्के जुइगु कथं ब्वनेकुथिया नां तयेमाःगु उल्लेख जूगुलिइ न्हयःने लाःथे विदेशी नां तयेदइमखु खँ पाण्डें कनादिल । ब्वनेकुथिया नां तयेत दक्कले न्हापां जिल्ला शिक्षा कार्यालयं पूर्वस्वीकृति कायेमाःगु खँ नं वय्कलं कनादिल ।
यदि ब्वनेकुथिइ विदेशी लगानी जूगु दुसा नेपाल सरकारं विदेशी नां तयेत स्विकृति बिइगु खँ शिक्षा मन्त्रालयया प्रवक्ता जनार्दन नेपालं धयादिल । नापं विद्यार्थी संगठनतय्सं ल्हना वयाच्वंगु माग नीतिगत कथं थिक जुसां आन्दोलनया नामं भौतिक क्षति यायेगु ज्या धाःसा उचित मजूगु खँ कनादिल । अथेहे प्रक्रिया कथं नां हिइकेत छुं ई काइगु व नेपाल देय्या ना झल्के जुइगु कथंया शिक्षण सस्थाया नां तयेकेत शिक्षा मन्त्रालयय् प्रतिबद्ध जूगु खँ नं कनादिल ।
शैक्षिक संस्थाया सञ्चालकतय्सं विदेशी नां तया वया च्वंगुलिइ देय्या राष्ट्रियता कमजोर जुया वनाच्वंगु धासें थीथी विधार्थी संगठनतय्सं आन्दोलन न्ह्याका वयाच्वंगु खः ।
