युवा बौद्ध समूहया निगू सफू पितब्वज्या
सुनीता मानन्धरं च्वयादीगु "अजा अिजं कनातःगु बाखं" व त्रिरत्न मानन्धरं च्वयादीगु "आर्थिक सरोकार र बुद्धको शिक्षा" नांया सफू छगू ज्याझ्वःया दथुई शनिवाः विमोचन जुल ।
युवा बौद्ध समूहया ग्वसालय् जूगु उगु ज्याझ्वलय् मूपाहां नापं वातावरण विज्ञान नापं प्रविधि मन्त्री डा. केशवमान शाक्यं विमोचन यानादीगु खः । विमोचनया झ्वलय् मन्त्री शाक्यं सरकारी ज्याकुथी नेवाःतय्गु ल्याः थ्यंमथ्यं शून्यया अवस्था जूगुिलं झी नेवाःत सचेत जुइमाःगु धयादिसें नेवाःत राजनीतिक कथं नं न्ह्यज्यायेमाःगु धयादिल ।
समूहया नायः त्रिरत्न तुलाधरया सभाध्यक्षताय् जूगु उगु ज्याझ्वलय् "अजा अिजं कनातःगु बाखं"यात कयाः उपन्यासकार शशिकला मानन्धरं व "आर्थिक सरोकार र बुद्ध शिक्षा"यात कयाः इन्द्रशक्ति बज्राचार्यं समीक्षा यानादीगु खः ।
समूहया न्वकू तेजनारायण मानन्धरं लसकुस यानादीगु उगु ज्याझ्वलय् युवा बौद्ध समूहया संस्थापक नायः हर्षमुनि शाक्य आर्थिक सरोकार र बुद्धको शिक्षा सफूया पिकाकः मदन बहादुर तुलाधर नापं च्वमि सुनीता मानन्धर व त्रिरत्न मानन्धरं नं थःथःगु नुगःखँ प्वंकादीगु खः ।
