यलय् पञ्जाष्टमी हनाच्वन
राजेन्द्र शाक्य
थौं गुंलाथ्व अष्टमी, यलय् पंज्रां हनाच्वंगु दु। थीथी अन्न लिसें ध्यबा दान बिया: दँयदँसं थौंया दिनय् यलय् पंज्रां वा पञ्जदान हनी। 'पंज'या अर्थ जमीनय् सइगु थीथी अन्न ख:। उकिं अन्न दान बीगु दिं जुया: थौंया दिंयात पंज्रां धाइगु ख:। थौं सुथंनिसें आपालं भक्तजनत थीथी बिहारलिसें बौद्धस्थलय् वना: दान बियाच्वंगु दु।
बुद्धधर्मय् दानया यक्व हे महत्व दु। बुद्ध जुइत मा:गु झिगू पारमिता मध्ये दानपारमिता नं छगू ख:। स्वनिगलय् सम्यक महादान न्यायकीबले बिज्याकीपिं दीपंकर बुद्धया मूर्ती ब्वया: दान बीगु चलन दु। व हे कथं थौं यलया दीपंकर बुद्धपिनिगु मूर्ती सम्बन्धित खलकं ब्वया: दान बियाच्वंगु दु। यलय् नेपाल परम्परागत बौद्धधर्म संघं शाक्य वज्राचार्य समुदाययापिं मुंका: पंजा: फवनेत्यंगु दु। सुथय् झिता: इलय् यलया अथ:बहालं सुरु जुया: न्या:चुक, नागबहा:, क्वा:बहा: जुना: यलया फुक्क मूबहा:बही चा:हिला: दान का:वनेगु ज्याझ्व: दुगु नेपाल परम्परागत बौद्धधर्म संघया दुज: बिजयरत्न शाक्यं लहनायात कनादिल। संघं थुकथं पंजा: फयबले मुनीगु ध्यबा लुम्बिनीइ दयकाच्वंगु वज्रयान बिहारया लागिं छ्यलेगु जानकारी ब्यूगु दु।
पंज्रांखुनु शाक्य वज्राचार्यतयसं दान का:वनेगु चलन दु। उखे, वज्राचार्य पुजाविधी अध्ययन समितिं नं छुं ईलिपा यलय् मंका:कथं पंजा: फ:वनेत्यंगु दु। समितिं नं यलया मूबहा: व बही चा:हिला: पंजा: फ:वनेगु ज्याझ्व: क्व:छ्यूगु दु। येँय् धा:सा गुंलागा: जूग:च:ह्रय् खुनु पञ्ज्रां हनी।
