पुलांम्ह मन्त्री जोशीयात दत्याया कैद नापं जरिवाना
विशेष अदालतं नेपाली कांंग्रेसया नेता नापं पुलांम्ह मन्त्री गोविन्दराज जोशीं भ्रष्टाचार याःगु ठहर यासें दत्या कुनेगु फैसला याःगु दु ।
नायः गौरी बहादुर कार्की व दुजःत ओमप्रकाश मिश्र व केदार प्रसाद चालिसेया मंकाः इजलासं बुधवाः जोशीयात दत्या कुनेगु नापं २ करोड १६ गू लख १४ द्वः तका विगो व उलि हे बराबरयात जरिवानाया फैसला न्यंकूगु दु । जोशीया मुद्दाय् वादी नापं प्रतिवादी निगुलिं पक्षया बहस ६ गते क्वचायेधुंकाः फैसलाया तिथि बुधवाःया लागि क्वःछिउगु खः ।
हदम्याद पुलावंगु धासें सफाई बिउगु बिशेष अदालतया निर्णय उल्टेयासें सर्वोच्च अदालतं सुनुवाइया लागि विशेष अदालत छ्वःगु खः । बिशेषया लागि तत्कालिन नायः भूपराज अधिकारी नापं दुजःत कोमलनाथ शर्मा व चोलेन्द्र शम्सेर जबराया इजलासं २०६३ कार्तिक ३० गते हदम्यादया कारण क्यंसें जोशीया मुद्दा खारेज याःगु खः ।
स्वक्वः तक गृहमन्त्री नापं न्हय्क्वः तक मन्त्री जुयादीम्ह जोशीं पदया दुरुपयोग यानाः ३ गू करोड ९३ गू लख ६२ द्वः न्यासः व न्हय्नितका भ्रष्टाचार याःगु दाबी यासें अख्तियार दुरुपयोग अनुसन्धान आयोगं २०६० साल माघय् विशेष अदालतय् मुद्दा दायर याःगु खः ।
