खनालयात कोइरालां फोन याःबलय्
यें (सन्ध्या टाइम्स) / सरकारय् वनीपिं मन्त्रीतय् बारे पार्टी अध्यक्ष झलनाथ खनाललिसे खँ मिले मजुइवं प्रधानमन्त्री माधव नेपालं उकिया दुःख नेकां सभापति गिरिजाप्रसाद कोइरालाया थाय् समेत प्वंकादीगु जुयाच्वन । उकुन्हु निगूगु चरणया शपथ ग्रहण ज्याझ्वः लिपा प्रम नेपाल तप्यंक कोइरालाया छेँय् झाःगु खः । अन वनाः वय्कलं पार्टी अध्यक्ष झल-नाथ खनालं लाक्वपाक्व मनूतय्त मन्त्री दयेकि धकाः नां बियाः थःत मिछंकेगु ज्या यानाच्वन धकाः दुःख प्वंकादीगु जुयाच्वन । उगु इलय् वय्कलं न्ह्यःने लाःिपं मनूतय्त मन्त्री दयेकाः थःत असफल याइन धकाः समेत शंका यानादीगु खँ सूत्रं धाःगु दु ।
प्रम नेपालया खँ न्यने धुंकाः सभापति कोइरालां तुरुन्त हे झलनाथ खनालयात फोन यानादिल । फोनय् वय्कलं लाक्वपाक्व मनूतय्त सरकारय् मछ्वःसा जिउ धकाः आग्रह यानादिल ।
कोइरालायात लिसः बिसें खनालं 'छिं छ्वया हःपिं मन्त्रीत स्वयां जिं छ्वया हयापिं मन्त्रीत छगू स्तर च्वय् लाःपिं खः' धकाः धयाः हःगु खँ सूत्रं धाःगु दु ।
खनालं मन्त्रीया लागिं जातीय क्षेत्रीय समीकरण मिले यानाः प्यम्ह मनूया नां सिफारिस याःगु खः । वय्कलं थ्व प्यम्हं पार्टीया पुलांपिं कार्यकर्ता व चुनाव त्याकातःपिं नेतात खः धासें थुपिं कम से कम नं कांग्रेसं छ्वयाहःपिं मन्त्री स्वयां स्तर दुपिं खः धकाः नं दावी यानादीगु खः । सूत्रया कथं खनालया खँ न्यनाः कोइरालां थः अपमानित जूगु तायेकूगु खः ।
