स्वंगू दलया निर्णायक वार्ता बुधवाः
विपक्षी दलत नेपाली कांग्रेस व नेकपा एमालें दयाच्वंगु राजनीतिक पंगः मदयेका छ्वयेगु ताःचाः सत्तारुढ दल एकीकृत नेकपा माओवादीया ल्हातय् दुगु धाःगु दु ।
नेकपा एमालेया केन्द्रीय ज्याकू बल्खुइ मंगलवाः च्वंगु शीर्ष नेतातय्गु मुँज्यां माओवादीं पंगः चीका छ्वयेगु स्वयां सत्ताया आयु ताःहाकेगु खँय् केन्द्रीत जुयाच्वंगु धासें कन्हय् बुधवाः निर्णायक वार्ता यायेगु क्वःछिउगु दु ।
नेपाली कांग्रेसया महामन्त्री प्रकाशमान िसंहया कथं नेकपा माओवादी, नेपाली कांग्रेस व नेकपा एमालेया शीर्ष नेतातय्गु मुँज्या कन्हय् ११ ताः इलय् च्वनीगु जूगु दुसा उगु मुँज्याय् राजनीतिक पंगः मदयेका छ्वयेगु, सहमतिया सरकार दयेकेगु, चुनाव लिसेंया थी थी विषयस सहलह जुइ ।
स्वंगू दलया मुँज्याय् कांग्रेस व एमालें प्रधानमन्त्री डा. बाबुराम भट्टराईया राजीनामायात शर्तया कथं न्ह्यब्वयेगु सहमति याःगु दु । मेखे माओवादीं धाःसा चुनाव, शान्ति प्रकृयाया प्राविधिक विषययात प्राथमिकतया लिसें न्ह्यःने हयेगु तयारी याःगु दु । लडाकु समायोजनया प्राविधिक विषयस कांग्रेस व एमाले क्वःमिलु मजूसा शिविरय् च्वंगु ल्वाभःत सरकारयात लःमल्हासे संग्रहालय दयेकाः तयेगु व फुक्क लडाकुतय्त स्वेच्छिक अवकासय् छ्वयेगु माओवादीया क्वःछिना दु । लडाकुतय्गु उमेरया खँय् विवाद ब्वलनेवं लिपांगु इलय् लडाकु समायोजन प्रकृया दिनाच्वंगु खः ।
