आन्दोलनपाखें सत्ताच्यूत यायेत नेपालया उजं
नेकपा एमालेया वरिष्ठ नेता माधवकुमार नेपालं प्रधानमन्त्री डा. बाबुराम भट्टराईं याउँक सत्ता मत्वःतीगु जूगुलिं आन्दोलन यानाः सत्ताच्यूत यायेत युवा संघया कार्यकर्तातय्त उजं बियादीगु दु ।
आइतवाः येँया राष्ट्रिय सभागृहस युवा संघ नेपालया निन्हुया राष्ट्रिय कार्यकर्ता भेलाया उलेज्या यानादिसें नेता नेपालं उकथं उजं बियादीगु खः । वय्कलं पुलांम्ह जुजु ज्ञानेन्द्र विरुद्धया आन्दोलन शिथिल जूगु इलय् ल्याय्म्हतय्सं हे उर्जा बिउगु नं लुमंकादिल ।
उलेज्या यायेगु झ्वलय् नेता नेपालं माओवादीया विस्तारित मुँज्यां आःया इलय् सत्ता त्वःतेगु आत्मघाती जुइगु प्रस्ताव पारित याःगुलिं थथें हे सत्ता त्वःतीगु अवस्था मदुगुलिं आन्दोलनया विकल्प मदुगु नं धयादिल । थुकिया लागि सशक्त भूमिका म्हितेमाःगु नेता नेपालया धापू खः ।
थनिंनिसें न्ह्याःगु उगु भेलाय् जिल्ला नापं अंचल इन्चार्ज, जिल्ला नायः, अंचल संयोजक व छयांजे, विभागया छ्यान्जे, केन्द्रीय पदाधिकारी नापं दुजः व लेखा आयोगया दुजःत यानाः मुक्कं स्वसःम्ह कार्यकर्तातय्सं ब्वति कयाच्वंगु युवा सघं न्ह्यथंगु दु ।
