जनयुद्ध बारे संविधानसभाय् ल्वापु
यें (सन्ध्या टाइम्स) / संविधानसभाया सांस्कृतिक सामाजिक ऐक्यवद्धता आधार निर्माण समितिइ माओवादीं झिदँ तक न्ह्याकूगु जनयुद्धयात उल्लेख यायेगु वा मयायेगु धइगु बारे कांग्रेस व माओवादी दथुइ विवाद ब्वलंगु दु ।
थौं सुथय् च्वंगु समितिया बैठकय् माओवादीं संविधानय् जनयुद्ध खँग्वः नं न्ह्यथनेमाःगु माग याःगु खःसा कांग्रेसं उकिया विरोध याःगु खः ।
कांग्रेस सभासद् रणध्वज लिम्बुं माओवादी जनयुद्धया झ्वलय् भौतिक संरचना ध्वस्त याःगु द्वपं बिउगु खःसा उकिया लिसलय् माओवादीं सभासद् कालिबहादुर लिम्बुं कांग्रेसयात हत्यारा बलात्कारी धकाः द्वपं बीवं ल्वापु तच्वःगु खः ।
कांग्रेस व माओवादी दथुइ थ्व विवादया इलय् समितिया अध्यक्ष नवोदिता चौधरीं कःघाये थाकुगु खँ धाःगु दु । विवाद लिपा माओवादीया 'जनयुद्ध' धइगु खँग्वः दुथ्याकेगु वा दुमथ्याकेगु धइगु बारे मतदान तकं याये मालेफुगु खँ धाःगु दु ।
