नेवाः पत्रकारतय् येँ जिल्लाय् २१म्ह दुजः दुगु कार्यसमिति
नेवाः पत्रकारतय् राष्ट्रिय संगठन नेवाः पत्रकार राष्ट्रिय दबूया येँ जिल्लाया न्हापांगु सम्मेलनपाखें २१म्ह दुजः दुगु कार्यसमिति नीस्वंगु दु । सम्मेलनं गोरखापत्र न्हिपौया फोटो पत्रकार नातिकाजि महर्जनया नायःसुइ २१म्ह दुजः दुगु कार्यसमिति सर्वसम्मतं निर्वाचित जूगु खः ।
येँया क्षेत्रपाटी पार्टी प्यालेसय् जूगु न्हापांगु सम्मेलनय् नायः पदय् महर्जन नापं न्वकूइ नविन जोशी, रत्नकाजि महर्जन ‘लुनिभाः’ व प्रेरणा शाक्य, छ्याञ्जेय् प्रमित शाक्य, ल्यू छ्याञ्जेय् रश्मी नापित, दांभरीइ सुरेन्द्रभक्त श्रेष्ठ व ल्यू दांभरीइ मधु श्रेष्ठ निर्वाचित जुयादीगु खः ।
अथेहे दुजः पदय् विरेन्द्र विनु शाक्य, ज्ञान बहादुर महर्जन, सानु काजि महर्जन, शान्त दास शाक्य, यलु जोशी, अन्दीरा श्रेष्ठ, दिपा महर्जन, पौभा डंगोल, किच सिं ज्यापु, विगेन तुलाधर, अमित स्थापित, पुन्य राज शाक्य व श्याम प्रजापति निर्वाचित जुयदीगु खः । बन्दसत्र लिपा येँ जिल्ला समितिया न्हापांगु मुँज्या अन हे च्वंगु खः ।
बन्दसत्र स्वयां न्ह्यः सम्मेलनया उलेज्या यानादिसें वातावरण, विज्ञान व प्रविधि मन्त्री डा. केशवमान शाक्यं लोकतन्त्र, गणतन्त्र, संघीयता नापं समावेशीयता नाप पत्रकारीताया स्वापु दुगु न्ह्यथनादिल । वय्कलं थुपिं फुक्कं पक्षया बांलागु पक्ष उजागर यानः जनताया न्ह्यःने हयेगु दायित्व पत्रकारतय् जूगुलिं थज्याःगु ज्याया निंतिं नेवाः पत्रकारत संगठित जुइमाः खँ धयादिल ।
नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं वंगु जेठ १४ गते संविधान जारी जुइमफुगु छगू मू दोषी मूलधारया संचार माध्यम नं जूगु धयादिल । मूलधारया संचार माध्यमं संघीयता बारे गलत प्रचार यागुलिं हे संघीयता सम्बन्धी भ्रम ब्वनाच्वंगु धयादिसें वय्कलं अज्याःगु संचारकःमि व संचार माध्यमया गलत ज्याया धलः दयेकाः जनताया दथुइ नेवाः पत्रकारतय्सं हयेमाःगु बिचाः प्वंकादिल ।
येँ जिल्ला सम्मेलन सम्योजन समितिया कजि नृपेन्द्रलाल श्रेष्ठया सभापतित्वय् जूगु ज्याझ्वलय् नेवाः देय् दबूया नायः नरेश ताम्राकार, नेवाः राष्ट्रिय पत्रकार दबूया नायः श्रीकृष्ण महर्जन, दबूया सल्हाकार प्रो. माणिकलाल श्रेष्ठ, नेपाल पत्रकार महासंघया दांभरी बैकुण्ड भण्डारीं नं भिंतुना न्वचु बियादीगु खः ।
इमेज च्यानल व सगरमाथा टिभीया सम्मान
इमेज च्यानल व सगरमाथा टिभीं थःगु स्थापना कालं निसें हे नेपालभाषाया माध्यमं नं बुखँ प्रशारण यानावयाच्वंगुलिं निगूलिं संचार माध्यमयात ज्याझ्वलय् हनेगु ज्या जुल । येँ जिल्लाया न्हापांगु सम्मेलनया उलेज्या ज्याझ्वलय् मन्त्री शाक्यं निगूलिं टिभी च्यानलयात हनापौ लःल्हानादीगु खः । इमेजपाखें टिभीया प्रवन्ध निद्रेशक रघुवीर मानन्धर व सगरमाथाया प्रतिनिधि गणेशमान गुरुङं हनापौ लःल्हाना कयादीगु खः ।
