मेधसी पत्रकरतय्गु रिले अनसनय् नेवाः पत्रकारतय्गु एक्यबद्धता
मधेसी पत्रकारतय्सं संचार माध्यमय् समावेशीतया माग यासें यानाच्वंगु रिले अनसन प्रति नेवाः पत्रकारतय् राष्ट्रिय संगठन नेवाः पत्रकार राष्ट्रिय दबूपाखें एक्यबद्धता प्वंकेगु दु । मंगलवाः निसें अनामनगरया मधेसी मिडिया हाउसया ज्याकुथी जुयाच्वंगु उगु रिले अनसनय् नेवाः पत्रकार राष्ट्रिय दबूलिं एक्यबद्धता प्वंकेगु खः ।
'साम्प्रदायिक संचार विखण्डनया पूर्वाधार, समावेशी संचार एकताया आधार धइगु' नारा बियाः च्वनाच्वंगु रिले अनसनय् दबूया नायः श्रीकृष्ण महर्जन, न्वकु राज्य लक्ष्मी शाक्य, मूछ्याञ्जे उदेन न्हूसाय्मि, दुजःपिं रचना श्रेष्ठ, सुगतरत्न सिन्दुराकार लगायतया नेवाः पत्रकारत वनाः ऐक्यबद्धता प्वंकेगु ज्या याःगु खः ।
उगु इलय् सरकारया स्वामित्वलय् दुगु रेडियो नेपाल, गोरखापत्र व राष्ट्रिय समाचार समितिइ समावेशी प्रतिनिधि जुइमाःगु धइगु मधेसी, आदिवासी जनजाति व नेवाःतय्गु मंकाः मुद्दा जूगु खँ दबूया नायः महर्जनं धयादिल । नापं थुगु मंकाः मुद्दायात सशक्त ढंगं ल्व्नेत बहिष्करणय् लाःपिं फुक्कं समुदायया संचारकःमित नापं न्ह्याः वनेमाःगु खँ धयादिल ।
मधेशी पत्रकार समाजया ग्वसालय् न्ह्याःगु अनसनलय् मधेश मिडिया हाउस, मधेशी मिडिया तथा अनुसन्धान केन्द्र, सञ्चार कार्य तथा अनुसन्धान समूह ‘मार्ग’, एडिटर्स एलायन्स फोर मधेश, मधेशी चलचित्र पत्रकार समाज, मधेशी शिक्षा पत्रकार समाज, मधेशी महिला पत्रकार समाज, लायन्स मिडिया, न्यूज अप्रेशन व सहारा टाइम्स लगायत संस्थां नं समर्थन प्वंकूगु दु ।
