भारतीय कलाकार खन्ना मन्त
भारतया न्हापांम्ह सुपरस्टार राजेश खन्ना ७० दँया बैंशय् बुधवाः मन्त । खन्नाया मुम्बइलय् च्वंगु थःगु हे छेँ "आशिर्वाद"य् मदुगु भारतीय संचार माध्यमं न्ह्यथंगु दु । वयकः जलास्येँ व स्येँ सम्बन्धि ल्वचं कयाच्वंम्ह खः । छवाः न्ह्यः जक वय्कः "लीलावती" अस्पतालं डिस्चार्ज जुयादीगु खः ।
कलाकार खन्ना संकिपाया क्षेत्रया नापनापं राजनीतिइ नं उलि हे सकि्रय जुयाच्वनादीम्ह खः । भारतीय कांग्रेस पार्टीपाखें सांसद जुयादीम्ह खन्ना सन् १९९२ य् दिल्लीइ जूगु उपचुनावय् सांसदय् त्याःगु खः । सन् १९९६ तक सांसद जुयादीम्ह खन्ना उबलय् तक छुं नं संकिपाय् म्हितेगु प्रस्ताव अस्वीकार यानादीगु खः ।
कलाकार खन्ना सन् १९६९ य् पिलूवःगु 'आराधना' संकिपापाखें चांचां स्टार जुयादीगु खः सा 'खामोशी'इ याःगु अभिनययात कयाः तसकं तारिफ यासें सुपरस्टारया दर्जा बिउगु खः । वय्कलं सन् १९६९ निसें १९७२ या दुने लगातार १५ गू हिट संकिपा बिउगु खः गुगु रेकर्ड आःतक सुना नं त्वाःथलेफूगु मदुनि ।
कटी पतंग, अमर, प्रेम अपना, देश आपकी, कसम, नमक हराम, आवाज, प्रेम नगर, आनन्द आदि वय्कःया हिट संकिपा खः ।
