'जनजाति आन्दोलन स्यंकेत थीथी प्रलोभन'
आदिवासी जनजाति महासंघया महासचिव आङकाजी शेर्पां आदिवासी जनजाति आन्दोलन स्यंकेगु निंतिं थीथी थासं प्रलोभन क्यनेगु ज्या जुयाच्वंगु खँ धयादीगु दु । आदिवासी जनजाति आन्दोलन चुनौतिपूर्ण इलय् थ्यंगु न्ह्यथनादिसें संघीय विरोधी तत्वतय्सं आदिवासी जनजातितय्गु आन्दोलन स्यंकेगु योजना कथं थीथी प्रलोभन बिइगु ज्या तिव्र यानाच्वंगु धयादिल ।
आदिवासी जनजाति महासंघ पोर्तुगलया निक्वःगु महाधिवेशनया उल्लेज्याया झ्वलय् शेर्पां थःत प्रलोभन कथं एमालें केन्द्रीय दुजः व माओवादीं मन्त्री दयेका बिइगु प्रलोभन बियाच्वंगु खुलासा यानादिल । थ्व प्रलोभन धाइगु दलतय्गु झोलाय् कार्यकर्ता दयेकेगु कुत जक जूगु न्ह्यथनादिसें थज्याःगु चक्रब्यूइ आदिवासी जनजातित फसेजूइमजिउगु बिचा प्वंकादिल ।
जनजातित छधी छप्पँ जूगु इलय् बल्खु, सानेपा व पेरिसडाँडाय् भूख्या ब्वःगु धयादिसें शेर्पां आदीवासी जनजातिया मू आज्जु धइगु पार्टीया झोला कार्यकर्ता जुइगु मखु धयादिल । वय्कलं शेर्पां जनजाति आन्दोलनया मू मर्म धाइगु पहिचान, प्रतिनिधित्व व पहुँच जूगु धयादिल ।
