मेट्रो एफएमया 'नेवाः राजनीतिक अभियान'यात हनेज्या
नेवाःतय्त राजनीतिक रुपं सचेत व क्रियाशिल यायेगु निंतिं मेट्रो एफएम ९४.६ मेगाहर्जपाखें न्ह्याकाः वयाच्वंगु 'नेवाः राजनीतिक अभियान'यात नेवाः राजनीतिक अभियानं हनेज्या यात ।
अभियानं नेवाःतय्त राजनीतिक रूपं सचेत यायेगु निंनिं 'नेवाः राजनीतिक अभियान' ज्याझ्वः न्ह्याकाकूगुलिं उगु सम्मान याःगु खः । शुक्रवाः अभियानया नायः डा. महेशमान श्रेष्ठया सभापितत्वय् जूगु ज्याझ्वलय् एफएमपाखें उगु ज्याझ्वः न्ह्याकादीपिं श्रीकृष्ण ज्यापु व उदेन न्हूसाय्मियात सम्मान याःगु खः ।
ज्याझ्वलय् मूपाहाँ प्रो. माणिकलाल श्रेष्ठं नेपाःया फुक्कं राजनीतिक हिउपालय् नेवाःतय्सं महत्वपूर्ण भूमिका म्हिताच्वंगुलिं नेवाःत न्हापा निसें हे राजनीतिक रूपं सचेत जूपिं जाति खः धयादिल ।
अभियानया नायः श्रेष्ठं थुगु सम्मान मेट्रोया निम्ह ज्याझ्वः न्ह्याकामित जक मखसें नेवाःतय्त सचेत याइपिं फुक्क रेडियोया ज्याझ्वः न्ह्याकामिपिंत याःगु कथं थुइकादीत इनाप यानादिल ।
अभियानया छ्याञ्जे शाक्य सुरेनं लसकुस यानादीगु ज्याझ्वलय् सम्मानित जुयादीपिं श्रीकृष्ण महर्जन, उदेन न्हूसाय्मि लगायतं नं थःगु नुगः खँ प्वंकादीगु खः ।
