सगरमाथा टेलिभिजनय् नेवाः पत्रकारतय् डेलिगेशन
सगरमाथा टेलिभिजनपाखें प्रशारण यानावयाच्वंगु नेपालभाषा नापं थीथी जनजाति भाय्या बुखँ बन्द याःगुलिं नेवाः पत्रकार राष्ट्रिय दबूलिं चिउता प्वंकूगु दु ।
टेलिभिजनं आर्थिक कारण क्यनाः असार २७ गते निसें थीथी भाय्या बुखँ प्रशारण बन्द यायेवं शुक्रवाः पत्रकार दबूया छगू प्रतिनिधिमण्डल सगरमाथा टेलिभिजनय् डेलिगेशन वंगु खः । उगु इलय् दबूपाखें थीथी भाय्या बुखँ लिकागु प्रति थःगु ध्यानाकर्षण जूगु धासें टेलिभिजनया प्रमुख निर्मल गुरुङयात ज्ञापनपौ लःल्हाःगु खः ।
उगु इलय् प्रमुख गुरुङं थः न्हापा निसें थीथी जातितय् भाय्, संस्कृति व कला संरक्षण यायेगु निंतिं लगे जुयाच्वम्ह मनू जूगु न्ह्यथनादिसें उकीया निंतिं हे न्यादँ न्ह्यःनिसें थःगु टेलिभिजनय् थीथी भासं बुखँ प्रशारण यानाच्वंगु धयादिल । अज्याःगु ज्या यानाच्वंसां जनजातितय्सं हे थःत ग्वाहालि मयागु धासें वय्कलं दुःख नं प्वंकादिल । वय्कलं आर्थिक समस्या हुनिं थीथी भाय्या बुखँ स्थगित जक जुयाच्वंगु धयादिसें हानं प्रशारण यायेगु बारे आन्तरिक सहलह यानाः निर्णय यायेगु धयादिल ।
डेलिगेशनय् नेवाः पत्रकार राष्ट्रिय दबूया प्रतिनिधित, नेवाः देय् दबुया नायः नरेश ताम्राकार नापं तामाङ, गुरुङ, थारु व शेर्पातय् राष्ट्रिय संगठनया प्रमुखतय् नं ब्वति दुगु खः ।
