सचिव पदय् प्यम्हेसिया बढुवा
सरकारं प्यम्ह सह सचिवयात सचिव पदय् बढुवा याःगु दु । बिहीवाः सुथय् च्वंगु मन्त्रिपरिषदया मुँज्यां दर्गानिधी शर्मा, ज्ञानदर्शन उदास, सूर्य सिलवाल व धनबहादुर तामाङयात सचिवय् बढुवा याःगु खः । खालि जुयाच्वंगु सचिव पदया निंतिं बढुवा समितिं झिंनिम्हसिया नां बिउलिइ सरकारं शर्मा, उदास, सिलवाल व तामाङयात बढुवा याःगु खः ।
अथेहे मुँज्याय् बजेट गज्याःगु हयेगु धइगु विषयस नं सहलह जूगु खःसां ठोस निर्णय धाःसा यायेमफुत । मुँज्या लिपा सूचना व संचार मन्त्री राजकिशोर यादवं एक तृतियांश वा आंशिक बजे हयेगु विषयस सहलह जूसां निर्णय जुइमफुगु धयादिल ।
अथेहे मुँज्यां विश्व बैंकपाखें ‘सुनौलो हजार दिन’ ज्याझ्वःया निंतिं बीगु स्वंगू अर्व व ४१ करोड, पुल सुधार व मर्मतया निंतिं न्यागू अर्व व ३१ करोड व कुवेत फण्डपाखें बुढीगण्डकी जलशाययुक्त आयोजनाया विस्तृत अध्ययन व निर्माण ज्या सुरु यायेत छगू अर्व व ५८ करोड ग्वाहालि कायेगु निर्णय नं याःगु दु ।
