राष्ट्रपतिपाखें जनरल सिंहयात मानार्थ महारथीया दर्ज्यानी चिं लःल्हात
नेपाःया न्यान्हुया भ्रमणय् झायादीम्ह भारतीय स्थलसेनाया सेनाध्यक्ष जनरल विक्रम सिंहं बुधवाः प्रधानमन्त्री डा. बाबुराम भट्टराईयात नापलानादीगु दु ।
बुधवाः न्हिनय् प्रधानमन्त्री ज्याकू सिंहदरवारय् नापलायेगु झ्वलय् नेपाः व भारतीय सेनाया स्वापू, ग्वाहालि नापं नेपाःया सेनाया अवस्थाया लिसें थी थी विषयस सहलह जूगु प्रधानमन्त्रीया निजी सचिवालयं न्ह्यथंगु दु ।
नेपाः थ्यनेवं प्रधानसेनापति छत्रमान सिंह गुरुङ्गलिसे सहलह यानादीम्ह जनरल सिंहं बुधवाः हे राष्ट्रपति ज्याकुथिइ जूगु विशेष समारोहया दथुइ राष्ट्रपति डा. रामवरण यादवपाखें मानार्थ महारथिया दर्ज्यानी चिं लःल्हाना कयादीगु खः ।
सन् १९६५ निसें नेपाः व भारतया सेनाध्यक्षयात मानार्थ महारथिया दर्ज्यानी चिं लःल्हायेगु परम्परा दुगु खः ।
भारतीय सेनाध्यक्ष सिंहं बुधवाः हे काभ्रेया पाँचखालय् च्वंगु वीरेन्द्र शान्तिकार्य तालिम केन्द्रया अवलोकन नं यानादीगु खः । अथेहे सिंहया सम्मानय् प्रधानसेनापति छत्रमान सिंह गुरुङ्गं जंगी अड्डाय् बेलीभ्वय्या ग्वसाः ग्वःगु दु ।
थ्वहे झ्वलय् सेनाध्यक्ष सिंह कन्हय् विहिवाः सुथय् मुस्ताङ्गया जोमसोमय् च्वंगु सैनिक उच्च शिविर शिक्षालयया भ्रमण याइगु ज्याझ्वः दुसा पोखराया भारतीय पेन्सन वितरण ज्याकू व नेपाःया सेनाया पश्चिम पृतना मुख्यालयया भ्रमण यानादी ।
अथेहे असार २९ गते भगवान बुद्ध बूगु लुम्बिनीया भ्रमण यानाः सेनाध्यक्ष सिंह ३० गते न्हिनय् भारत लिहांवनीगु ज्याझ्वः दुगु भारतीय राजदुतावासं न्ह्यथंगु दु ।
