सगरमाथा टिभीइ नेवाः भाय् लिसे आदिवासी जनजातिया ज्याझ्वः बन्द
नेपाःया दकले न्हापांगु समाचार टेलिभिजन कथं कयातःगु दाबी यानाः वयाच्वंगु सगरमाथा टेलिभिजनं थनिनिसें नेवाः भाय् नापं जनजातिया न्यागू भाय्या बुखँ नापं ज्याझ्वः लिकाःगु दु । उगु टेलिभिजनं नेवाः भाय् नापं तामाङ, गुरुङ्ग, मगर, मैथली भासं बुखँ बियाः वयाच्वंगु खः । थौं न्हिनय् १२ः१५ बजे बीमाःगु नेपालभाषां समाचार प्रशारण मयात । उगु टेलिभिजन पलिस्था जूगु थौंया दिंसं न्यादँ फुनाः खुदँय् थ्यंगु दुसा टेलिभिजन पलिस्था जूसांनिसें हे नेपालभासां बुखँ लिसे ज्याझ्वः उगु टेलिभिजनपाखें प्रशारण यानाः वयाच्वंगु खः ।
अथेहे नेवाः नापं जनजातितय्गु भासं बियाः वयाच्वंगु बुखँ लिसे ज्याझ्वः लिकाःगु कारण जनजातिया आन्दोलनया इलय् सगरमाथा टेलिभिजनयात आक्रमण याःगु, जनजातितय्गु भाषां समाचार तयाः नं जनजातितपाखें आर्थिक नापं छुं नं कथंया ग्वाहालि मदुगु, उगु समाचारं यानाः आर्थिक रुपं द्यापं जूगु आदि कारण न्ह्यःने तयाः थुगु कथंया पलाः ल्ह्वंगु खः ।
सगरमाथा टेलिभिजनया पहिचान जुयाच्वंगु उगु कथंया आदिवासी जनजाति नापं नेवाः भासं बीगु समाचार लिसे ज्याझ्वः लिकाःगुलिं नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबूपाखें दुःख प्वंकूगु दु । नेवाः पत्रकार राष्ट्रिय दबूया नायः श्रीकृष्ण महर्जनं सगरमाथा टेलिभिजनं जनजातिया समाचार नापं मेमेगु ज्याझ्वः लिकाःगुलिं सरोकारवालातय्गु दथुइ सहलह ब्याकाः याकनं स्वयाः याकनं उगु ज्याझ्वःयात निरन्तरता बीकेगु ज्या यायेत नेवाःतय्गु खलः पुचः, नेवाः न्ह्यलुवाःनिसें आदिवासी जनजातिया सरोकारवालातय्त इनाप याःगु दु ।
