नेपाः राष्ट्रिय पार्टीया यल व नगर कचा स्वन
नेपाः राष्ट्रिय पार्टीया यल व नगर कचा घोषणा याःगु दु । पार्टीया नायः नापं वातावरण, विज्ञान व प्रविधि मन्त्री डा. केशवमान शाक्यया मूपाहाँसुइ शनिवाः यलय् जूगु ज्याझ्वलय् सुरेश प्रधानया संयोजकत्वय् यल कमिति घोषणा याःगु खः । समितिइ दुजः कथं काजीरत्न शाक्य, पुष्परत्न शाक्य, किरण शाक्य, दिपक वैद्य, किर्तिश्यामसुन्दर जोशी, राजु महर्जन, रत्नबहादुर बज्राचार्य च्वनादीगु खः । नगर कमितिइ कुमार श्रेष्ठ, विकास ताम्राकार व रमेश डंगोल च्वनादीगु दु ।
अथेहे नगर कमितिइ संयोजक कथं कुमार श्रेष्ठ च्वनादीगु दुसाः दुजः कथं विकास ताम्राकार, पुगेन्द्र वैद्य, राजित बहादुर श्रेष्ठ, विरेन्द्र श्रेष्ठ, विक्रम शाक्य, भेष बहादुर शिल्पकार, किर्तिजनार्दन जोशी च्वनादीगु दु ।
ज्याझ्वलय् मूपाहाँ पार्टीया अध्यक्ष नापं मन्त्री शाक्यं वर्तमान राजनीतिक परिस्थितिइ नेपाः राष्ट्रिय पार्टीपाखें नेवाः पत्रकारतय्गु निंतिं नं सरकारयापाखें ग्वाहालि बिइगु, नेशनल ट्रेडिङ्गया अधिग्रहण यानातःगु जग्गा सरकारं मीत्यंगु निर्णय पनागु बारे कनादिल ।
पार्टीया दांभरी सुरेश प्रधानया सभापतित्वय् जूगु ज्याझ्वलय् पार्टीया प्रवक्ता किरणं शाक्यं लसकुस यासें आः कांग्रेस, एमाले व माओवादी जुयाः मखःसें नेवाः जुयाः न्ह्यां वनेमाःगु न्ह्यथनादिल । वय्कलं संविधानसभा पुनर्स्थापना यानाः पहिचान सहितया संविधान वइगु खःसा थःपिन्त आपत्ति मदुगु खँ नं न्ह्यथनादिल ।
संगठन विभाग प्रमुख नरेशवीर शाक्य पार्टीया खँ न्ह्यथनादीगु खसाः पार्टीपाखें संविधानसभाय् प्रतिनिधित्व याःम्ह पुलाम्ह सभासद् बुद्ध साय्मिं संविधान दयेकेगु ज्याय् तःधंगु दलया नेतातय् च्यूताः मदुगु धासें आः आदिवासी जनजातिया थःगु हे पार्टी नीस्वनेगु खँ लसकुस यायेवहःगु खँ खः धयादिल । थुगु खँय् आपालं खँ मिलेजूगु व मिलेमजूगुयात सहलह यानाः छप्पँ जुयाः न्ह्यावनेगु खँ नं कनादिल ।
