नाटकया बारे कार्यशाला गोष्ठी
नेपालभाषाया न्हूगु नाटक सिर्जना याकेगु तातुनां "प्रेम-मोहन सिरपाः गुथि"पाखें शनिवाः छगू कार्यशाला गोष्ठी जुल ।
गुथिया नायः राजा शाक्यया सभाध्यक्षताय् "प्याखनय् न्हूगु प्रविधि" विषययात कयाः कार्यशाला गोष्ठी जूगु खः । उगु कार्यशाला गोष्ठीइ डा. मय्जु सावित्री मल्ल कक्षपितं पश्चिमी नाटक व रंगशील्प परम्परा विषयस ज्यापौ न्ह्यब्वयादीगु खः । अथेहे नेपालभाषाया नाटक साहित्यय् दुगु थी थी प्रबृत्ति व प्रवाहयात कयाः गुथिया दुजः प्रा. प्रेमशान्ति तुलाधरं ज्यापौ न्ह्यब्वयादीगु खः ।
गुथिया दुजः नापं बाखंच्वमि लक्ष्मण राजवंशीं लसकुस यानाः न्ह्याःगु उगु ज्याझ्वलय् नाटककार नापं च्वमि अशेष मल्लं नाटकयात कयाः न्वचू बियादीगु खः । नापं गोष्ठीइ ब्वति कयादीपिं ज्ञानकाजी मानन्धर, शशिकला मानन्धर, पुष्कर माथेमा, राजभाई जकःमि, गणेशराम लाछि, अगिव बनेपाली, बज्रमुनि बज्राचार्य, माणिक उराय् लिसेंया ब्यक्तिपिन्सं नाटक सम्बन्धि न्यनादीगु न्ह्यसःया लिसः नं विशेष पाहां मल्लं बियादिल ।
गुथिया दुजः शरद कसाः नं प्रेम बहादुर कसाःपाखें च्वयादीगु अनुसन्धानमूलक च्वसू झीगु नाटक परम्पराया सारांश ह्यब्वयादीगु उगु ज्याझ्वलय् सिरपाःया दाता ई. मोहनकृष्ण डंगोलं सुभाय् बियादीगु खः ।
नाटक व उपन्यास विधायात कयाः निदँय् छक्वः बीगु थुगु प्रेममोहन सिरपाः थुगुसि नाटक विधायात बीत्यंगु खःसा नाटकया पाण्डुलिपि वइगु ने.सं. ११३३ बछलाथ्व १० या दुने दुथ्याकादीत नं इनाप याःगु दु ।
