नेवाःया याकः हाइकु मुँज्याय् "वँचुगु सर्गः" पितब्वज्या
च्वमि बुद्ध शाक्य नेवाः नं च्वयादीगु हाइकु मुना सफू "वँचुगु सर्गः" छगू ज्याझ्वःया दथुइ पितब्वज्या जुल ।
पलिस्थाया नीखुक्वःगु साहित्यिक मुँज्याया झ्वलय् जुगु बुद्ध नेवाःजया पलिस्था याकः मुँज्या ज्याझ्वःया मूपाहां नापं समालोचक इन्द्र मालीं उगु सफू पितब्वज्या यानादीगु खः । सफुतिइ मुक्कं १०८ पु हाइकु दुथ्यानाच्वंगु दु ।
नेपालभाषा परिषदया नायः फणिन्द्र रत्न बज्राचार्यया सभाध्यक्षताय् जूगु उगु मुँज्याय् च्वमि बुद्ध शाक्य नेवाः नं पितब्वज्या जूगु सफुतिइ दुमथ्याःगु न्यय्प्यपु हाइकू ब्वना न्यंकादीगु खः । वय्कलं च्वयादीगु हाइकुयात कयाः समालोचक साहित्यकार डा. पुष्पराज राजकर्णिकार व माधवलाल कर्माचार्य समीक्षा यानादीगु खः । समालोचक कर्माचार्य उसाँय् मदुगु हुनिं ज्याझ्वलय् झाया मदीगुलिं वय्कःया समीक्षा छ्यान्जे प्रेम साय्मिं ब्वनाः न्यंकादीगु खः ।
जगतसुन्दर ब्वनेकुथिया सभाकक्षय् जूगु उगु ज्याझ्वलय् पूर्णकाजी ताम्रकारं च्वमि शाक्यया म्हसीका न्ह्यब्वयादीगु खः ।
दँय्दसं यानावयाच्वंगु पलिस्थाया साहित्यिक मुँज्याय् छम्ह जक साहित्यकारया च्वसू ब्वना न्यंकेगु ज्या जूगु थ्व न्हापांखुसी खः ।
