एमाले दुने पहिचान पक्षधरतय् न्हूगु शक्तिया पूर्वाभ्यास
अग्रगामी बिचाः पुचःया केन्द्रीय समन्वय समिति नीस्वन
नेकपा (एमाले) दुने संघीयतापाखें हे ल्यूने वनेमाःगु एजेण्डा तकं न्ह्यने वयाच्वंगु इलय् एकल पहिचान सहितया नेतात धाःसा थःगु एजेण्डा बल्लाकेगु निंतिं न्हूगु शक्ति निर्माणया पूर्वाभ्यासय् लगेजूगु दु ।
न्हूगु शक्ति निर्माण कथं एमाले दुनेया आदिवासी जनजाति, मधेशी, मुस्लिम व दलित नेतात दुथ्याःगु अग्रगामी बिचाः पुचःया केन्द्रीय समन्वय समिति नीस्वंगु दु । वंगु असार १८ गते येँय् बुद्धनगरय् च्वंगु असन्तुष्ट पक्षधरय् मुज्यां पार्टी उपाध्यक्ष अशोक राईया संयोजकत्वय् ३६म्ह नेतात दुथ्याःगु उगु समिति नीस्वंगु खः ।
समितिं पार्टी दुनेया संघर्ष कथं एकल पहिचान सहितया मुद्दायात पार्टीया कार्यकर्ता तह तक अवगत यायेगु कथं वैचारिक संघर्षयात तीव्र यायेगु निर्णय याःगु दु । नापं यदि एकल पहिचान सहितया मुद्दायात पार्टीं याकन सम्बोधन मयाःसा न्हूगु शक्ति निर्माण यानाः न्ह्याः वनेगु निर्णय तकं याःगु दु ।
स्वीखुम्ह दुजः दुगु समितिइ रामचन्द्र झा, पृथ्वी सुब्बा गुरुङ, विजय सुब्बा, किरण गुरुङ, रकम चेम्जोङ, राजेन्द्र श्रेष्ठ, दलबहादुर राणा, जयन्ति राई, महिन सुब्बा, अजम्बर काङबाङ, हेमराज राई, रणधोज कण्डङवा, महेश चौधरी, रिजवान अन्सारी, मंगलसिद्धि मानन्धर, राजकुमार राई, सुशीला श्रेष्ठ लगायतया नेता दुथ्याः ।
असन्तुष्ट एमाले नेतातय्सं न्हूगु केन्द्रीय समन्वय समिति नीस्वनेवं विश्लेषकतय्सं उकीयात न्हूगु पार्टी चायेकेगु तयारी जूगु खँ धाःगु दु । विश्लेषकतय्सं एमाले दुने वैचारीक संघर्ष माओवादी व कांग्रेस थें मजूगुलिं याकनं हे न्हूगु शक्ति न्हूगु पार्टीया रुपय् वइगु खँ धाःगु दु ।
उखे केन्द्रीय समन्वय समिति नीस्वंगु छन्हु लिपा असार १९ गते च्वंगु एमालेया बाग्मती अञ्चल स्तरीय भेलाय् पार्टीया असन्तुष्ट पक्षयात कारवाही यायेत दबाव वःगु दु । पार्टी उपाध्यक्ष बामदेव गौतम, अनुशासन विभागया संयोजक अमृत बोहरा लगायत नेतातय् ब्वति दुगु भेलाय् असन्तुष्ट आदिवासी जनजाति, मधेशी नेतातय्त पार्टीं अनुशासनया कारवाही यायेमाःगु बिचाः उगु भेलाय् ब्वति काःपिंसं तःगु खः ।
माओवादी दुने निदँ तक पार्टी दुने आन्तिरिक संघर्ष व कांग्रेस दुने गुला तक जूगु पार्टी दुनेया आन्तिरिक संघर्षय् सुयातं कारवाही मयागु तर एमाले दुने समन्वय समिति नीस्वंगु कन्हय् कुन्हु हे कारवाहीया माग जूगुलिं नं ताः ई तक एमाले छप्पँ जुइ मफइगु विश्लेषकतय् धापु दु ।
