रमिता तण्डुकार जुल "पपुलर प्लेयर अफ दि इयर"
भलिबल कासामि रमिला तण्डुकारं थुगु दँया पपुलर प्लेयर अफ दि इयरया सिरपा कायेत ताःलाःगु दु । तण्डुकारं त्रिकेटर शक्ति गौचन, फुटबलर भरत खवास, एथलेटिक्सया सविता चौधरी व टेनिसया आश्लेसा लिसानोभिचयात लिउने लाःका थुगु सिरपा त्याकेत ताः लाःगु खः । सिरपा कथं तण्डुकारयात पल्सर मोटरसाइकल लःल्हाःगु खः ।
बुधवाः नेपाल खेलकुद पत्रकार मञ्चया ग्वसालय् जूगु अवार्ड ज्याझ्वलय् तण्डुकारयात उगु सिरपा लःल्हाःगु खः । उगु ज्याझ्वलय् थीथी च्यागु विधाया कासामि व प्रशिक्षकतय्त सिरपा बिउगु खः ।
अथेहे दँया उत्कृष्ठ मिसा कासामिया सिरपा भारोत्तोलन कासामि तारादेवी पुनं त्याकादिल । पुनं एथलेटिक्सया प्रमिला रिजाल, पौडीया श्रेया धिताल, टेबलटेनिसया नविता श्रेष्ठ व ब्याडमिन्टनया नंशलादेवी तामाङयात ल्युने लाःका थुगु सिरपा त्याकेत ताः लाःगु खः ।
उखे दँया उत्कृष्ठ मिजं कासामिया सिरपा गल्फ कासामि शिवराम श्रेष्ठं त्याकादिल । श्रेष्ठं क्रिकेटर पारस खड्का, पौडीया शैलेश राणा, एथलेटक्सया तिलकराम थारू व घोडचढीव ध्रुवप्रसाद अर्यालयात लिउने लाका थुगु सिरपा त्याकेत ताः लाःगु खः ।
प्लेयर अफ दि इयर(युथ विधा) सिरपा क्रिकेटर पृथु बास्कोटा त्याकादिलसाः उत्कृष्ट प्रशिक्षकया सिरपा क्रिकेट प्रशिक्षक जगत टमाटा, पाराएथलिट अफ द इयर शर्मिला लामिछाने, स्पेसल सिरपा अफ दि इयर नेपाल भारोत्तोलन संघया नायः रतन टन्डन व लाइफ टाइम अचिभमेन्ट अवार्ड नेपाःया न्हापाम्ह ओलम्पिएन भुपेन्द्र सिलवालयात लःल्हाःगु खः ।
दँया उत्कृष्ट मिजं कासामि, मिसा कासामि व लोक पपुलर प्लेयर अफ द इयरं बजाज पल्सर मोटरसाइकल नापं ट्रफी लःल्हाःगु खः धाःसा मेमेगु विधाया त्याकामिपिंसं रू. ३०,००० नगद व ट्रफी लःल्हाःगु खः ।
