प्रमं हानं जातिय खँ ल्ह्वन : सिंह
नेपाली कांग्रेसया महामन्त्री प्रकाशमान सिंहं प्रधानमन्त्री डा. बाबुराम भट्टराईं जातियताया नारा ल्ह्वनेत्यंगु धासें आपत्ति प्वंकादीगु दु । वय्कलं थःगु पार्टी जातीय राज्यया विपक्ष दुगु धयादिसें प्रधानमन्त्री भट्टराईं हानं जातीयताया नारा ल्ह्वनेत्यंगु द्वपं बिइयादिगु दु । नापं वय्कलं सकल नेपाःमितय्गु पहिचानयात स्वीकार यायेमाःगु बिचाः प्वंकादिल ।
नेपाल विद्यार्थी संघं स्वर्गीय गिरिजाप्रसाद कोइरालाको ८९औं जन्मजयन्तीया लसताय् मंगलवाः येँय् जूगु छगू ज्याझ्वलय् वय्कलं सहमति यानाः वनेमाःगु इलय् प्रधानमन्त्री भट्टराईं जातीय खँ यानाच्वंगु व एनेकपा (माओवादी)या जातीय राजनीतिया मोहया हुनिं देय् हानं द्वन्द्वय् वनेगु खँ कनादिल ।
प्रधानमन्त्री भट्टराईं मंगलवाः सुथय् जक स्वीम्ह स्वयां अप्व जनजाति न्ह्यलुवातय्त नापलाना पहिचान सहितया संघीयता पक्षधरतय् मंकाः मोर्चा दयेकाः यंकेगु प्रस्ताव तयेवं कांग्रेस महामन्त्री सिंहया अज्याःगु प्रतिक्रिया वःगु खः ।
महामन्त्री सिंहं न्हूगु संविधान दयेकेत व राज्य पुनर्संरचनाया विषयस दल दथुइ सहमति जुइ मफुगु बुँदायात जनमत संग्रहलय् यंकाः ज्यंकेमाःगु बिचाः प्वंकादिल । वय्कलं मिले जूइफुगु विषययात सहमति यायेगु व ल्यंदुगु विवादित विषययात जनमत संग्रह यानाः ज्यंकेमाःगु धयादिल ।
