फोरमया मधेश बन्द, माओवादीया तमुवान बन्द
मधेशी जनअधिकार फोरमं याःगु मधेश बन्द व माओवादीं आव्हान याःगु तमुवान क्षेत्र बन्द देया अधिकाशं थाय्या जनजीवन प्रभावित जूगु दु ।
सत्ता गठबन्धन नेपाली कांग्रेस व नेकपा एमालें थःगु पार्टी विभाजन यायेत स्वःगु धासें फोरमं थौं मधेश बन्द याःगु खः । बन्दया कारणं पूर्वी व मध्य तराईया जनजीवन प्रभावित जूगु दु । फोरम कार्यकर्तातय्सं वीरगन्जया माईस्थान घन्टाघर, प्रतिमाचोक, मुरलीचोक लगायत थासय् टायर च्याकाः सतक अवरोध याःगुलिं वीरगन्जं चलेजुइगु दक्वं सवारी साधन ठप्प जूगु दु ।
बन्दया कारणं तराईया उद्योग, कलकारखाना, शिक्षण संस्था आदि दक्वं बन्द जूगु दु । बन्दकर्तातय्सं शिक्षण संस्थाय् हस्तक्षेप मयायेगु धासां सवारी साधन चलेमजूगुलिं शिक्षण संस्था नं बन्द जूगु दु ।
फोरम कार्यकर्तातय्सं बाराया जीतपुर, नीतपुर, परवानीपुर लगायत थासय् नं टायर च्याकाः सतक अवरोध याःगु दु । सदरमुकाम कलैयाय नं बन्दया प्रभाव लाःगु दु । अथेहे बन्दकर्तातय्सं थाय् थासय् टायर च्याकाः विरोद्ध प्रदर्शन यानाच्वंगु दु ।
अथेहे, थौं हे माओवादीया भातृ संगठन तमुवान राज्य समितिं राष्ट्रपतिया पला भिंकेमाःगु, भारतीय पक्षं सीमा अतिक्रमण याःगु विरोधय् व तमुवान स्वायत्त राज्य घोषणा यायेमाःगु माग यासें याःगु बन्दं गण्डकी व धौलागिरी अंचलया च्याःगु जिल्लाया जनजीवन प्रभावित जूगु दु ।
माओवादी तमुवान राज्य दुने लाःगु गण्डकीया कास्की, गोरखा, तनहुँ, स्याङजा, लमजुङ व मनाङ व धौलागिरीया पर्वत व मुस्ताङया जनजीवन प्रभावित जूगु दु ।
बन्दया कारणं पर्यटकीय स्थल पोखराया जनजीवन ठप्प जूगु दु । अन दक्वं पसः बन्द जुयाच्वंगु दुसाः बन्दकर्तातय्सं साइकल तकं चले याये ब्यूगु मदु । बन्दकर्तातय्सं सुथंनिसें जुलुस पिथंसें शहरया मुख्य चोक चाहिलाच्वंगु दु ।
