संघीयता पक्षधर नापं मोर्चाबन्दी याना न्ह्यावनेगु : प्रधानमन्त्री
प्रधानमन्त्री डा. बाबुराम भट्टराईं पहिचान सहितया संघीयता पक्षधरतय् मंकाः मोर्चा दयेकेगु प्रस्ताव तयादीगु दु । आदिवासी जनजाति न्ह्यलुवात नाप आइतवाः प्रधानमन्त्री निवास बालुवाटारलय् नापलाय्गु झ्वलय् प्रधानमन्त्री भट्टराईं एकल जातय पहिचान सहितया संघीयताया पक्षय् दुपिं फुक्क पक्ष दुथ्याकाः मंकाः मोर्चा नीस्वनाः न्ह्यावनेगु प्रस्ताव तयादीगु खः । जनजाति नेतातय्सं प्रस्ताव सकारात्मक जूगु धासें मोर्चा दयेकेगु खँय् सहमति प्वंकूगु खः ।
उगु इलय् संविधानसभा पुनःस्थापना यायेगु, संवैधानिक आयोग गठन यायेगु वा सरकारं घोषणा याःगु निर्वाचनयात निरन्तरता बिइगु धाइगु विषयस नं सहलह जूगु खः ।
प्रधानमन्त्री भट्टराई नाप जूगु उगु सहलह ज्याझ्वलय् एमालेया उपाध्यक्ष अशोक राई, पृथ्बीसुब्बा गुरुङ, रकम चेमजोङ, किरण गुरुङ व कांग्रेसया इन्द्रबहादुर गुरुङ,
जीपछिरीङ लामा, नेवाः न्ह्यलुवाःत प्रा. माणिकलाल श्रेष्ठ, मल्ल के. सुन्दर, आदिवासी जनजाति महासंघया नायः राजकुमार लेखी, पुलाम्ह नायः ओम गुरुङ, रेणु राजभण्डारी लगायतया ब्वति दुगु खः ।
एकीकृत (माओवादी)या नायः पुष्पकमल दाहाल 'प्रचण्डं' संघीयता पक्षधर नापं मोर्चाबन्दी यानाः न्ह्यावनेगु अभिव्यक्ति सार्वजनिक जूगु छुं न्हि लिपा माओवादी उपाध्यक्ष नापं जुयादीम्ह प्रधानमन्त्री भट्टराईं जनजाति नेतात नाप परामर्श याःगु खः ।
